Окумуштуулар: "Таракандар каратэ өнөрүнө ээ"

Вандербильт университетинин окумуштуулары таракандар каратэ өнөрүндөгү айрым ыкмаларды колдонорун аныкташты. Бул тууралуу Daily Mail басылмасы жазып чыкты.

Маалыматка ылайык, таракандардын бул жөндөмдүүлүгүн аныкташ үчүн окумуштуулар аарыларды жана таракандарды бири-бири менен уруштурушкан. Таракандардын өзүн сактап калуу үчүн кылган аракети өзгөчө түрдө болгон. Кандайдыр бир ыкма менен уруш жүргүзүүнүн ордуна таракандар ыкчам түрдө арткы буттары менен айланып сокку узатып турушкан.

Окумуштуулар айланада болуп жаткан нерселерди бат кабыл алууга таракандардын мурутчалары жардам берерин изилдеп чыгышкан. Мурутчалар антенна сымал болуп соккунун багытын көрсөтүп турат. Айланып сокку узатуу ыкмасын эксперимент жүргүзүлгөн таракандардын 63 пайызы колдонгон.