Австралияда кулпунайлардын артынан алмуруттарда да ийнелер табыла баштады

Сентябрь айында Австралиядагы азык-түлүк саткан дүкөндөрдөн кулпунайлардын ичинен ийне чыгып, сатыктан алынып жаткандыгы тууралуу маалымат тараган. Ал эми кечээ жакында эле кулпунайлардын ичине ийнелерди атайлап сайган деген жүйө менен кулпунай фермасынын 50 жаштагы кызматкери камакка алынган.

Ушундай эле ийнелер Австралиянын Мельбурн шаарында алмуруттарда да табыла баштаганын ABC News телеканалы айтып чыкты.

Маалыматка караганда, аталган телеканалдын кызматкери Клэр Бонсер унаа айдап бара жатып алмурут жеп өзөк жалгап алууну каалаган. Бирок алмурутту тиштеген соң ичинде ийне бар экенин байкап калган.

"Ийнени көргөн соң алмурутту жаныма коюп койдум. Мен ийнени жутуп алсам же ал оозумдун бир жерин тилип кетсе эмне болмок деп ойлондум. Эң коркконум ал ийнеден оору жуктуруп алышым да толук ыктымал эле", - деп билдирген Бонсер.

Аталган факт боюнча полиция кызматкерлери иликтөө иштерин башташты. Ал эми Бонсер алмурут сатып алган дүкөндүн кызматкерлери Сифорд шаарында да кардар алмуруттан дал ушундай ийне таап алганын кабарлашкан.

Автор: Айзада Тураркулова