Грузиянын өкмөтү жарандардын банктардагы карыздарынан кечүү чечимине кол койду

Грузиянын өкмөтү 600 миңге жакын жарандын банктардагы карызын жокко чыгарууну чечти. Бул тууралуу жергиликтүү басылмалар жазып чыгышты.

Маалыматка караганда, өкмөттүн мындай кадамына көптөгөн жарандардын "кара тизмеге" түшүп калгандыгы себеп болгон.

"Өлкөдө 600 миңге жакын жарандын банктардын, онлайн-уюмдардын жана башка финансылык институттардын алдында 565 миллион 300 миң доллар карызы бар. Бүгүнкү чечимге ылайык, аталган карыздар кечирилет", - деп билдирген премьер-министр Мамука Бахтадзе.

Өкмөт башчысы 600 миңге жакын жарандын ичинен 150 миң адам жардамга муктаж, ал эми он миңдеген адамдар ден соолугунун мүмкүнчүлүгү чектелген адамдар экенин кошумчалаган.

"Биздин эл Жаңы жылды эч кандай карызы жок тосот" деген Бахтадзе. Карыздарды кечүү 15-декабрда башталып айдын аягына чейин созулат.

Автор: Айзада Тураркулова