Бишкекте жүргүнчүлөрүн зордуктоого аракет кылган таксисттен жабыр тарткандар изделүүдө

Бишкекте унаасынан 3 жүргүнчүсүн зордуктоого аракеттенген таксисттен жабыркагандар изделүүдө. Бул тууралуу бүгүн, 6-декабрда SUPER.KG порталына Октябрь райондук ички иштер башкармалыгынан билдиришти.

Маалыматка ылайык, кардарларын зордуктоого аракеттенген таксист 27-ноябрда милиция кызматкерлери тарабынан колго түшүрүлгөн. Анын үстүнөн жазылган арыздардын негизинде кылмыш иши козголуп, ал 2 айга камакка алынган.

"Окуя тууралуу видео тарагандан кийин жабырлануучу өзү милицияга келип арыз жазган. Андан соң 49 жаштагы Б.Ч. аттуу таксисттин сексуалдык мүнөздөгү ыплас аракеттеринен жабыркаган дагы 2 шаар тургуну арыз менен милицияга кайрылган. Эгер анын мындай мүнөздөгү аракеттеринен башка дагы жабыркагандар болсо Октябрь РИИБине же (0559) 10-27-92 номуруна кайрылса болот", - деп билдиришти милициядан.

Окуянын чоо-жайына кайрылсак:

Мындан бир нече күн мурун социалдык тармактарда унаада жардам сурап кыйкырган аялдын видеосу тараган. Интернет колдонуучулар белгисиз аялды унаасына камап алган таксистти жазага тартууну өтүнүшкөн. Видео тараган соң таксист милиция кызматкерлери тарабынан кармалып, андан кийин анын үстүнөн дагы 2 аял арыз жазышкан.

Автор: Мальвина Уметбекова
Фото: Мальвина Уметбекова