Финансы министри кызматына президенттин кеңешчиси Бактыгүл Жээнбаева сунушталды (өмүр баяны)

Финансы министри кызматына Бактыгүл Жээнбаева сунушталып, анын талапкерлигин бүгүн парламенттик комитет карамакчы. Аталган маалыматты SUPER.KG порталына депутат Исхак Масалиев тастыктады.

Эл өкүлүнүн айтымында, парламенттин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин регламенти боюнча комитетинин жыйыны 11-декабрдан 10-декабрга жылдырылган.

"Бүгүн финансы министри кызматына талапкердин маселеси каралат. Комитеттин эртеңки жыйыны бүгүнкүгө жылдырылды", - деди Масалиев.

Бактыгүл Жээнбаева президенттин кеңешчиси болуп июль айында дайындалган.

Адылбек Касымалиев финансы министри кызматынан өз арызынын негизинде 6-декабрда кеткен.

Бактыгүл Жээнбаева 1960-жылдын 31-июлунда Бишкек шаарында туулган. Экономика илимдеринин кандидаты. Учурунда "Кыргызстан коммерциялык банкынын" директорлор кеңешинин төрайымы болуп, кийин Улуттук банктын төрайымы, 2011-2015-жылдары аталган мекеменин жетекчисинин орун басары катары эмгектенген. Мамлекеттик ипотека компаниясынын башчысы болуп да иштеген. Ошондой эле 2016-жылдын декабрына чейин "Айыл банктын" башкаруучулар кеңешинин төрайымы болгон. 2018-жылдын июлунан тарта президент Сооронбай Жээнбековдун кеңешчиси болуп иштеп жаткан.

Автор: Бектур Токтоноев