Президент Коопсуздук кеңешинин кезектеги жыйынын өткөрөт

Президент Сооронбай Жээнбеков Коопсуздук кеңешинин жыйынын өткөрөт. Бул тууралуу президенттик аппараттын маалыматтык саясат бөлүмүнөн таратышты.

Маалыматка караганда, иш-чара 14-декабрда өтөт.

"Азырынча сааты айтыла элек. Жыйынга журналисттер киргизилбей да калышы мүмкүн", - деди президенттик аппараттан.

Коопсуздук кеңешинин бул жолку жыйыны "Кыргыз Республикасында санарипти өнүктүрүү боюнча чаралар жөнүндө" деген темага арналат.

Жээнбеков президент катары төрагалык кылган Коопсуздук кеңешинин алгачкы жыйыны ушул жылдын 8-февралында өткөрүлгөн. Анда сот, укук коргоо жана көзөмөл органдарындагы коррупцияга каршы күрөшү боюнча маселе каралган.

Жыйынтыгында 45 иш-чарадан турган чечим кабыл алынган. Анын ичинде ошол убакытка чейин токтотулган жана кыскартылган кылмыш иштерин кайрадан карап чыгуу, коррупцияга каршы күрөштү күчөтүү өңдүү чаралар камтылган.

Автор: Бектур Токтоноев