Финансылык чалгындоо мамлекеттик кызматы интернетке тараган документ боюнча түшүндүрмө берди

Өкмөткө караштуу Финансылык чалгындоо мамлекеттик кызматынын коммерциялык банктардан мүлк сактаган кардарлардын маалыматын берүүнү талап кылган документи бүгүн, 18-декабрда интернетке тараган. Мекеменин басма сөз катчысы Махабат Токторбаева бул боюнча SUPER.KG'ге түшүндүрмө берди.

Ал аталган кызмат банктардан кардарлардын маалыматын берүүнү талап кылганы чын экенин ырастап, документти интернетке тараткан тараптарга чара көрүлөрүн белгиледи.

"Ушул жылдын август айында террордук ишти каржылоого жана кылмыштуу кирешелерди легалдаштырууга (адалдоого) багытталган жаңы мыйзам кабыл алынган. Ошол мыйзамдын жана Стамбул планынын 4-раундундагы отчётунун негизинде биздин кызмат коммерциялык банктардан мүлк сактаган кардарлардын маалыматын берүүнү сурап жатат. Бул боюнча бардык коммерциялык банктардын өкүлдөрү менен жолугушуулар өткөрүлүп, түшүндүрүү иштери жүргөн. Ал эми интернетке тараган маалымат чындык. Биздин кызматтын аты айтып тургандай эле документибиз жашыруун болушу керек болчу. Бирок ким чыгарганы азырынча белгисиз. Бул үчүн атайын териштирүү иштери жүргүзүлүп, ачыкка чыгаргандарга чара көрүлөт", - деди Токторбаева.

Автор: Жамалидин Парманкулов