ЖЫЛНААМА, 19-ЯНВАРЬ: "Туулган күнүмдө Алматы шаарында кызматта болом" дейт 34 жашка чыккан Жийдеш Идирисова

Кыргыз шоу-бизнесинин белгилүү жылдызы Жийдеш Идирисова 34 жашка толду. SUPER.KG порталы ырчыны туулган күнү менен куттуктап байланышка чыкканда ал Алматы шаарына бара жатканын айтты.

"Туулган күнүмдө Алматы шаарында кызматта болом. Азыр Казакстанга сапар алдым. Бир канча убакыт мурда майрамдык иш-чарага чакыруу келип, макул болуп койгом. Буюрса, ал жактан келгенден кийин жакындарым, курбуларым менен туулган күнүмдү белгилейм. Ал эми жолдошум бир күн мурда туулган күнүм менен куттуктап микрофон, чачка керектүү буюмдарды берген. Учурда социалдык түйүндө жеке каналымды ачып, видеоблог даярдап жатам. Ошол видеолордогу үндөр так болсун деп профессионалдуу микрофон тартуулады", - дейт ырчы.

Жийдеш Идирисова 1985-жылы 19-январда Нарын шаарында туулган. Ал "Эдем алмасы" аттуу тасманын саундтрегин аткарып, эл оозуна алынган. "Артек" музыкалык тобунда 6 жылдан ашык иштеп, андан соң "Сен" деген ыры менен жеке карьерасын баштаган. 2015-жылдын 19-декабрында Түркиянын Стамбул шаарында өткөн "Turkvizyon 2015" эл аралык сынагынын гранд-финалында мамлекетибиздин атынан чыккан ырчы Жийдеш Идирисова "Ким билет?" аттуу ырды аткарып, 1-орунду ээлеген.

Ырчы жолдошу Андрей Доргайга турмушка чыккандан 6 жыл өткөндөн кийин никесин мыйзамдаштырып, үлпөт той өткөргөн. Түгөйлөрдүн ортосунда Севара жана Адэл аттуу кыздары бар.