Биринчи вице-премьер: "Февраль айында ички каттам менен каттоого эки чакан учак сатып алуу боюнча сүйлөшүүлөр жүргүзүлөт"

Февраль айында ички каттам менен каттоого эки чакан учак сатып алуу боюнча сүйлөшүүлөр жүргүзүлөт. Бул тууралуу бүгүн, 22-январда Кыргыз Республикасынын Жогорку Кеңешинин Транспорт, коммуникациялар, архитектура жана курулуш боюнча комитетинде биринчи вице-премьер-министр Кубатбек Боронов билдирди.

"Ички рейстерди атайылап каттатпай коюу же рейстерди азайтуу максаты жок. 18-январь күнү 8 рейс учкан жок. Эртеси күнү тиешелүү жабдыгы алмаштырылган соң учак рейске чыккан. Учурда аэропорттордун абалын карап жатабыз. Азыркы күндө 3 аэропорттун абалы өтө начар. Ал Каракол, Талас жана Кызыл-Кыядагы аэропорттор, аларды кайра оңдоого болбойт. Ошондой эле ички каттам менен каттай турчу эки чакан учак сатып алууга аракеттерди көрүп жатабыз. 2018-жылы сүйлөшүүлөр болгон. Ушул жылдын февраль айында 1-2 компаниянын өкүлдөрү менен жолугушуп, сүйлөшүү жүргүзөбүз",- деди Боронов.