ЖЫЛНААМА, 4-ФЕВРАЛЬ: Балет бийчиси Чолпонбек Базарбаев көзү тирүү болгондо 70 жашка чыкмак

Балет бийчиси, СССРдин Эл артисти Чолпонбек Базарбаев Нарын облусунун Кочкор районундагы Чолпон айылында 1949-жылдын 4-февралында туулган. 1959-жылы Фрунзедеги Кыргыз мамлекеттик музыкалык жана хореографиялык окуу жайына тапшырып, аны 1967-жылы бүтүргөн.

1966-1993-жылдары А.Малдыбаев атындагы Кыргыз мамлекеттик академиялык опера жана балет театрынын солисти, кийин генералдык директору, ал эми 1993-1996-жылдары Кыргыз Республикасынын маданият министри, 1996-жылдан Кыргыз Республикасынын билим берүү, илим жана маданият министринин 1-орун басары, ошол эле учурда 1987-жылдан Кыргызстан театр ишмерлер союзунун президенти болуп иштеген.

Базарбаев улуттук жана классикалык бийдин техникасын мыкты өздөштүрүү менен балет спектаклдеринде ар кыл мүнөздөгү образдарды психологиялык жактан терең ачып берген. Чолпонбек Базарбаев Кыргызстан Ленин комсомолу (1977), эл аралык “Мин Ои” (Япония, 1995), эл аралык Ч.Айтматов атындагы сыйлыктардын лауреаты. Ал 2002-жылдын 2-сентябрында автокырсыктан көз жумган.

4-февралга карата жылнаама.

Автор: Жылдыз Джускембаева