"Башыбыз аман калганына сүйүнүп жатабыз" дейт "Ош базары" аймагынан чыккан өрттөн жабыркаган тургун

Кечээ, 1-апрелде Бишкектин Б.Бейшеналиева көчөсүндө жайгашкан №57 А жана №57 Б турак үйлөрүнөн өрт чыгып, өрт саат 17:47де толугу менен өчүрүлгөн. Үйүнүн чатыры күйгөн Бүбүжан Момунова өрт газ баллондун жарылышынан чыккан дейт.

"Өрт саат 15:30 чамасында башталды. Кошунамдын газ баллону жарылып кетип, жалындап күйүп баштады. Биз өрт өчүрүү кызматын чакыртып ызы-чуу түшүп калдык. Кырсык болгондон бир саат мурун эч себепсиз башым ооруй баштаган. Эмнеге деп таң калып дары ичип койгом. Көрсө, кошунанын газ баллонунан газ чыгып жаткан экен да. Кошунам тамак-аш жасап сатат. Мындан бир күн мурун эле ага жолугуп, сен көп тамак жасайсың, абайла өрт чыкса баарыбызга зыян келет деп айткам.

Кырсыктан 3 үй-бүлөнүн үйү зыянга учурады. Эки үй-бүлөнүн үйү жараксыз болуп калды. Бир үй-бүлө мүчөлөрү кечээ айылына кетип үйүндө жок болушкан экен. Ал эми газы жарылгандар кайда болгонун билбейм.

Өрттөн үйүбүздүн чатыры толугу менен күйүп кетти. Жашаганга болбой калды, дагы жакшы башыбыз аман калды. Кошунабыз чыгымыңарды эсептеп чыккыла деп жатат. Азыр эми жаңы жыйнаштырып баштадык. Эч ким жабыркабаганына эле шүгүр келтирип отурабыз", - дейт Момунова.

Автор: Айсалкын Качкынбекова
Фото: Айсалкын Качкынбекова