Кутмандуу кечиңиздер менен ардактуу футбол күйөрмандары! Бүгүн 3-апрелде АФК Кубогунун тайпалык баскычынын алкагындагы Кыргыз өлкөсүнүн "Дордой" клубу түркмөнстандык "Алтын Асыр" клубун кабыл алууда. Беттеш саат 20:00дө башталып, Бишкектеги Дөлөн Өмүрзаков атындагы стадиондо орун алды. SUPER.KG порталы бүйүр кызыткан беттешти онлайн чагылдырат. Андыктан биз менен бирге болуңуздар!
19:19. Алгач эки команданын негизги курамы менен таанышып алыңыздар.
"Дордой" клубу:
Айзар Акматов
Мустафа Юсупов
Курсанбек Шератов
Бекжан Сагынбаев
Кайрат Жыргалбек
Фархат Мусабеков
Антон Землянухин
Вахид Орозшахедов
Павел Матяш
Артур Валикаев
Мирлан Мурзаев
Башкы машыктыруучу - Александр Крестинин.
"Алтын Асыр" клубу:
Маммед Оразмухаммедов
Зафар Бабажанов
Мекан Сапаров
Алтымурад Аннадурдуев
Селим Нурмурадов
Мурат Якшиев
Ресул Хожаев
Мекан Ашыров
Гурбангелды Батыров
Сердар Гелдиев
Аннаев Мурат
Башкы машыктыруучу - Язгулы Хожагелдиев.
19:28. Командалар беттеш алдындагы машыгууларын өткөрүүдө.
20:00. Командалар оюн талаасына чыгып, калыстын ышкырыгы жаңырды. Топту оюнга коноктор кошту. "Дордой" көк, ал эми "Алтын Асыр" ак түстөгү формада ойнойт.
20:03. Алгачкы мүнөттө коноктор өз жарым талаасында топту башкарууда. Бирок чабуулга өтүү мүмкүнчүлүгү азырынча жок.
20:04. Бишкектик клубдун оюнчулары алгачкы жолу топко ээ болоору менен чабуулга чыкты. Биринчи жарым кооптуу абал түзүлдү.
20:06. Талаа ортосунда "Алтын Асырдын" оюнчуларына карата эреже бузуу болуп, айып сокку дайындалды. Бирок коноктор андан эч кандай майнап чыгара алышкан жок.
20:09. Эреже бузуу кезеги коноктордо. "Дордойдун" оюнчуларынын ылдам чабуулун атаандаштар буттан чалуу менен токтотту.
20:18. Кооптуу абал. "Дордой" клубунун оюнчулары ылдам чабуул уюштуруп, дарбазага 3-4 метр аралыктан сокку узатылды. Тилекке каршы коноктордун коргоочулары топту тосуп калды.
20:22. Бишкектик клубдун дагы бир чабуулу Мирлан Мурзаевдин алыстан узатылган соккусу менен жыйынтыкталды. Бирок топ дарбазадан өйдө кетти.
20:26. "Дордой" клубу үстөккө-босток чабуулдарын улантууда. 2 мүнөткө жакын аралыкта 3 жолу кооптуу абалды түзгөнгө жетишти. Бирок топ дарбазадан орун ала элек. Күйөрмандар футболчуларды колдоп жатышат.
20:30. Акыркы 15 мүнөттөн бери коноктор оңдуу чабуулга чыга элек. Ал эми талаа ээлери дээрлик ар мүнөт сайын атаандаштын дарбазасына жакындап келүүдө.
20:34 Кыргыз футболчуларына каршы орой эреже бузуу катталды. Бардыгы калыстын көз алдында болгондуктан коноктордун оюнчусу Зафар Бабажанов сары айып кагазын алды.
20:40. Беттештин алгачкы бөлүгүнүн жыйынтыкталышына 5 мүнөт калды. "Алтын Асыр" коргонуусун улантууда.
20:43. Коноктордун чабуулу орун алды. Дарбазага жалгыз чыгып барган чабуулчуну дарбазачы Павел Матяш токтотуп калды.
20:45. Гоооол! "Дордой" клубу оюн эсебин ачты. Мурзаевдин соккусу коргоочуга тийип барып Вахид Орозшахедовго келди. Дарбазачы менен жекеме-жеке чыккан Орозшахедов дарбазага топту таамай багыттады.
Беттештин алгачкы бөлүгү аяктап, футболчулар эс алууга кетишти.
21:10. Беттештин 2-бөлүгү башталып, топту ортодон "Дордой" клубунун оюнчулары кошту. Алгачкы мүнөттөрдө коноктор активдүүлүгүн көрсөтүп 2-3 жолу жарым кооптуу абал түзгөнгө жетишти.
21:13. Айып аянтчасына жакын жерден эреже бузулуп, "Дордойдун" оюнчулары айып сокку аткаруу укугуна ээ болду. Бирок Мирлан Мурзаевдин соккусу дарбазага жеткен жок.
21:14. Кыргыз футболчулары дагы бир жолу айып сокку аткарышат. Бул ирет топ менен Антон Землянухин.
21:15. Землянухиндин узатып берген тобун командалашы дарбазага таамай багыттады. Бирок "Алтын Асырдын" дарбазачысы топту тосуп кала алды.
21:20. Коноктор бурчтан чыгарып берүү укугуна ээ болушту. Көтөрүлгөн топ дарбазага түз багытталган жок. Топ бишкектиктерде.
21:27. Дагы бир кооптуу абал Артур Валикаевдин аткаруусунда орун алды. Жакын жерден узатылган соккуну коноктордун дарбазачысы менен коргоочусу экөөлөп тосуп калышты.
21:29. Фархад Мусабеков айып аянтчасында кулап түштү. Бирок калыстын пикири боюнча бул абал пенальти дайындоого татыбайт.
21:34. Акыркы мүнөттөрдө топту көбүрөөк коноктор башкарууда. Бирок кооптуу чабуулдар орун ала элек.
21:37. Коноктор талаанын ортосуна жакын жерден айып сокку узатты. Жаралган кооптуу абалды талаа ээлеринин коргоочулары көзөмөлгө ала алышты.
21:40. "Дордойдун" катарында алмашуу: голдун автору Вахид Орозшахедовдун ордуна 10-номердеги Муролимжон Ахмедов кирди.
21:45. Гол! Коноктор эсеп санын теңеди. Ылдам чабуулдун жыйынтыгында коноктор 3 жолу жакын аралыктан сокку узатып, үчөөнү тең Павел Матяш тосуп калды. Тилекке каршы топ 4-ирет да коноктордун бутуна кайтып келди. Эсеп 1:1.
21:48. Эсеп теңелгенден кийин коноктор убакытты созуу аракетин көрүшүүдө.
21:50. Беттештин негизги бөлүгү жыйынтыкталып, кошумча мүнөттөр берилди.
21:53. Калыстын ышкырыгы жаңырып, беттеш тең чыгуу менен аяктады. "Дордой" клубу оюн талаасында үстөмдүүлүгүн көрсөтүп жатты. Оюндун экинчи бөлүгүндө "Алтын Асырдын" оюнчулары активдүүлүгүн көрсөтүп эсепти теңей алышты.
