Сузакта мыкаачылык менен өлтүрүлгөн 11 жашар баланын сөөгү жерге берилди

Жалал-Абад облусундагы Cузак районунда мыкаачылык менен өлтүрүлгөн 11 жаштагы баланын сөөгү жерге берилди. Бул тууралуу SUPER.KG порталына Барпы айыл өкмөтүнүн башчысы Абсаттар Сыргабаев билдирди.

Белгилүү болгондой, маркумду жерге берүү зыйнаты бүгүн, 9-июлда саат 11де болду. "Окуяны милиция кызматкерлери иликтеп жатышат. Эл катары жашаган үй-бүлөнүн баласы эле. Атасы такси айдап иштесе, апасы бала бакчада эмгектенчү", - деди ал.

Cузак районунун Каңды айылында 8-июлда 11 жашар баланын мыкаачылык менен өлтүрүлгөнү маалым болгон. Маркумдун денеси өз үйүнүн кире беришинен колу-буту скотч менен байланган абалда табылган. Денесинде 20дан ашык бычактан алган жаракаты бар экени аныкталган. Факты боюнча "адам өлтүрүү" беренеси менен иш козголуп, тергөө үчүн сотко чейинки өндүрүшкө алынды.

Жалал-Абад ОИИБинен кылмыш болгон учурда үйдө ата-энеси болгон эместигин айтышты. Маркум бала жана анын эжеси болгон. Мындан сырткары үйдөн "сенден балаң аркылуу өч алдым" деген жазуу бар кат табылганын билдиришкен.