Ички иштер министринин орун басарлыгынан бошотулган Курсан Асанов пакеттерге байланыштуу тарап жаткан видеого каршылыгын айтты. Бул тууралуу ал бүгүн, 13-августта SUPER.KG порталына билдирди.
"Чындык 40 күндө эмес, 40 мүнөттө чыкты. Мен бардык нерсеге каршымын. Күтө тургула, чындык өзү чыгат", - деди Курсан Асанов.
Интернетке Курсан Асанов мурдагы президент Алмазбек Атамбаевдин үйүнөн акча, алтын, бриллиант салынган пакетти алып чыгып кетти деген жазуусу бар видео тараган. Бирок видеодо акча, алтын, бриллиант бар экендиги көрсөтүлгөн эмес.
Башка булактарга кармоо операциясынан кийин тараган видеолорду карай келсек, жогоруда сөз болгон пакет Алмазбек Атамбаевдин жакындары менен кошо ИИМге жана УКМКга келгенин көрүүгө болот.
Бүгүн Курсан Асанов ээлеген кызматынан өкмөт башчынын буйругу менен бошотулду. Ал "милициянын кызыкчылыгын сатты" деген жүйөө менен кызматтан бошотулган. ИИМ "Атамбаевди кармоо операциясында Курсан Асанов кызматтык милдеттерин аткаруунун ордуна пиар менен алектенди" деген билдирүү таратты.