КСДПнын өкүлү Кундуз Жолдубаева: "Курсан Асанов бизге эч кандай маалымат берген эмес"

Тектеш кабарлар: Атамбаевдин кармалышынын чоо-жайы жана андан кийинки камакка алуулар (265 материал)

ИИМ Курсан Асановду "маалымат берген" деп кызматтан алганы үчүн актануу аракеттерин көрүүдө. Бул тууралуу бүгүн, 14-августта SUPER.KG порталына КСДПнын өкүлү Кундуз Жолдубаева билдирди.

"ИИМ аны кызматтан кетиргенин актоо үчүн Асановду каралоо аракеттери жүрүүдө. Сүйлөшүүлөрдө анын ролу чоң жана чечкиндүү. Сүйлөгөн сөздөрү ишеним арттыргандыгы үчүн Атамбаев аны менен сүйлөшүүгө барган.

Ал эми "акча алды" деген маалымат чындыкка дал келбейт. Анын айланасындагы азыркы жагдайга Курсан Асановдун Атамбаевди кармоодогу сүйлөшүүлөрдөн кийин чыккан атагы себеп болушу мүмкүн. Себеби бул окуядан кийин ал чыныгы "элдик генерал" экенин далилдеди.

Курсан Асанов бизге эч кандай маалымат берген эмес. Кой-Таштагы сүйлөшүүлөргө чейин жана андан кийин да биз байланышкан эмеспиз. Бул мүмкүн болгон эмес, себеби Кой-Ташта байланыш жок болчу. Ал эми ызы-чуу салган баштыктын ичинде папкадагы документтер гана болгон. Ал баштыктын кармагычы да үзүлүп калган болчу, алгач жан сакчынын жанында, кийин менин жанымда жүргөн", - деди Жолдубаева.