Экономика министри: "Азыркы учурда өлкө аймагында этти кайра иштетүү боюнча 296 ишкана катталган"

Бүгүн, 2-сентябрда Жогорку Кеӊештин комитетинде "Кыргыз Республикасындагы адал эт паркы" долбоорунун техника-экономикалык негиздемесин даярдоо үчүн техникалык жардам алууга грант берүү жөнүндө" мыйзам долбоору жактырылды.

Экономика министри Санжар Муканбетовдун айтымында, азыркы учурда өлкө аймагында этти кайра иштетүү боюнча 296 ишкана катталган жана иштеп жатат.

"Мал союу жайларын түзүү же иштеп жаткандарын модернизациялоо жана аларды эл аралык стандарттарга шайкеш келтирүү зарыл. Ушул багыттарда министрлик Ислам өнүктүрүү банкы менен заманбап адал эт паркын куруу боюнча долбоорго техникалык-экономикалык негиздемени биргеликте иштеп чыгуу жөнүндө макулдашууга жетишти", - дейт экономика министри.

Келишимге ылайык, Ислам өнүктүрүү банкы бул багытта 380 миӊ доллар каражат бөлүүгө даяр. Ал эми Кыргыз тараптын салымы – 50 миӊ доллар.

Автор: Жылдыз Джускембаева