2022-жылкы Дүйнө чемпиондугуна тандап алуу алкагындагы оюн: Кыргыз өлкөсү Тажикстанга 0:1 эсебинде жеңилди (хронология)

Кыргыз футболчулары "Катар-2022" мундиалына тандап алуу оюндарын жеңилүү ызасы менен баштады. F тайпасында бүгүн Монголия өз үйүндө Мьянманы 1:0 эсебинде жеңип алган. Тажикстан менен Монголия 3 упайдан алышып, тайпада алдыңкы орунга чыгышты. Япония бүгүнкү күнү ойногон эмес. 

Акыркы мүнөттөгү чабуул ийгиликтүү болбой калды. Тилекке каршы...финалдык ышкырык. Тажикстан - Кыргыз өлкөсү 1:0

Тажиктер ачык эле убакытты созуп башташты. Калыс мындай учурларды көзөмөлдөбөсө болбойт. 

89-мүнөт. 2 жолу катары менен бурчтан чыгарып берүү орун алды. Шукуров кооптуу айып соккуну иштеп тапты. 

Тажик футболчулары коргонууну эле ойлоп калышты. Топ келсе эле алдыга узатып коюп жатышат. Кези келгенде убакытты чоюуну да унутушкан жок. 

Стандарттык абал. Кыргыз футболчулары үчүн мүмкүнчүлүк. Бирок Байматов топко жетпей калды. 

Матяяяш! Дагы бир голдон куткарып калды. Чабуулчунун соккусун тосконго үлгүрдү.  

76-мүнөт. Курамыбызда акыркы алмаштыруу орун алды. Фархат Мусабековду Алимардон Шукуров алмаштырды.

Оюндун 71-мүнөтү. Козубаев өзүн башкара албай, ышкырыктан кийин топту тээп салды. Сары айып кагазы ага ыйгарылды. Муну менен биздин курамдагы үчүнчү футболчу жазаланды. 

Биздин курамда алмаштыруу. Дүйшөбековдун ордуна Боколеев кирди. Коргоочуну чабуулчу алмаштырды. 

Талаа ээлери чабуулга көп чыкпай калды. Контр чабуулга өтүү менен алек болууда. Топ көбүнесе кыргыз футболчуларында болгону менен чабуулдар уюшулбай жатат. 

Эсепти теңеш үчүн соккуларды узатуу керек. Биздин футболчулар 2-таймда бир дагы сокку узата элек. 

Кайрадан кооптуу чабуул. Жалиловдун соккусун Матяш тосуп кетти. Муну менен Матяштын 4-сактап калуусу катталды. 

Оюн көбүнесе ортоңку бөлүктө өтүүдө. Люкс топтун артынан талаанын ортоңку бөлүгүнө чейин келүүдө. "Ак шумкар" чабуул уюштура албай жатат. 

Эмнегедир тажик футболчулары оңой эле чабуулга өтүп кетип жатышат. Кыргыз футболчуларына чабуул уюштуруу кыйын болууда. 

Мурзаевдин соккусу таамай болбой калды. 2-таймды кыргыз футболчулары активдүү баштады. 

2-тайм башталды. Курамда өзгөрүүлөр бар. Ахлидин Исраиловдун ордуна Турсунали Рустамов кошулду. 

1-тайм соңуна чыкты. Эсеп 1:0 Тажикстандын пайдасында. 

Гол. Тажиктердин 10-катардагы оюнчусу Алишер Жалилов жакынкы бурчка узаткан соккусу таамай болду. Эсеп саны ачылды. 1:0

Кайрадан Матяяяяш! Айып белгиден узатылган соккуну тосуп кетти. 

Тажиктердин дагы бир кооптуу чабуулу. Азыр 20 метр аралыктан айып соккусу орун алат. 

Азамат Байматов жаракат алуу менен атаандашты токтотту. Өзү сары айып кагазын алды. Дарыгерлердин көзөмөлүндө. 

Мурзаееев! Анын узаткан соккусу дарбаза мамысына тийип калды.

Талаа ээлеринин күчтүү прессинги жемишин берүүдө. Уламдан улам кооптуу чабуулдар уюштурулуп жатат. 

Матяяш! Эки жолу Матяяяш! Тажик футболчуларынын алыстан узаткан соккусун жана ага кошумча узатылган соккуну тосуп кетти.

Алгачкы сары айып кагазын Кайрат Жыргалбек уулу алды. Ал каршылашына жете албай эреже бузууга аргасыз болду. Сол капталдан айып сокку орун алат. 

Стадиондогу күйөрмандар бир мүнөт да тынчыган жок. Барабаны, кыйкырык-сүрөөнү токтобой үй ээлерин алга сүрөөдө. 

Үй ээлери маал-маалы менен кооптуу чабуулдарды уюштурууда. Биздин футболчуларыбызда борбордук бөлүктөн көп топ жоготуу болуп жатат. 

Дүйшөбеков талаанын ортоңку бөлүгүнөн эреже бузду. Калыс сөз менен эскертүү берди. Азырынча. 

Сокку! 11-катардагы тажик футболчусунун соккусу дарбазанын сол бурчуна таамай болуп кала жаздады. Кооптуу учур. 

Оюндун 10-мүнөтү артта калды. Эки команда бири-бирине тең тайлашып оюн көрсөтүүдө. Тажик футболчулары эрежени байма-бай бузууда. Бул да атайын тактика.   

Баймааатов! Айып соккудан көтөрүлгөн топту башы менен сокку узатты эле дарбазадан өйдө кетти. Биринчи кооптуу абал. 

Тажик оюнчулары маал-маалы менен оюн эрежесин бузушууда. Сол капталдан Сагынбаевди чалып жыгышты. 

Тажиктердин биринчи соккусу орун алды. Кыйла эле таамай эмес. 

19-катардагы Люкс активдүүлүгүн көрсөтүүдө. Талаа ээлери эми гана топко ээ болушту. Алар өз чабуулдарын баштоодо. 

Топко ээлик "Ак шумкарда". Люксту чалып жыгышты. Айып белгиден бурчтан чыгарып берүү орун алат. 

Бул оюнда капитандыкты Эдгар Бернхардт аркалайт. Башкы калыс Иорданиядан. Оюнга ышкырык берилди. Топту оюнга кыргыз футболчулары кошот. Кеттик, анда! 

Тажикстан курама командасынын негизги курамы. 

Бүгүнкү оюнга жаракаттарынан улам Виктор Майер, Гүлжигит Алыкулов жана үй-бүлөлүк себептерден улам команда капитаны Валерий Кичин катыша алышпайт. Кичин бүгүн үйлөнүү тоюн өткөрүп жаткандыгы белгилүү болду. Капитанга бакыт каалайбыз! 

Эки команданын негизги курамы белгилүү болду. Бул оюнга Крестинин Азия Кубогунда ойногон 5-4-1 тактикасын колдонот. 

Дарбазачы: Матяш

Коргоочулар: Сагынбаев - Байматов -Козубаев - Дүйшөбеков - Жыргалбек уулу

Жарым коргоочулар: Бернхардт - Мусабеков - Исраилов - Мурзаев

Чабуулчу: Люкс

Урматтуу окурмандар, саналуу мүнөттөрдөн кийин 2022-жылкы Дүйнө чемпиондугуна тандап алуу оюндарынын алкагында Тажикстан-Кыргыз беттеши орун алат. Оюн Бишкек убактысы боюнча саат 20:00дө башталат. 

Александр Крестининдин шакирттери Азия Кубогунан кийин бир эле жолу жолдоштук беттеш өткөргөн. Анда Бишкекте Палестина менен болгон оюн 2:2 эсеби менен аяктаган. Эми жаңы кадамды таштоого убакыт келди. "Ак шумкар" үчүн жаңы чакырык - Катар-2022 мундиалы.