Тынар Курбаналиев бүгүн ооруканадан чыга турганын айтты

Куудул Тынар Курбаналиев көк бөрү ойноп жатканда чекеси жарылып, ооруканага түшкөнү тууралуу маалымдалган. Бүгүн, 11-октябрда куудул мырза үйүнө чыгарылат. Мындай маалыматты Тынар Курбаналиев өзү билдирип, окуя тууралуу айтып берди.

"Кудайга шүгүр, ден соолугум жакшы. Мен үчүн кабатыр болуп жаткан күйөрмандарыма ыраазымын. Ал эми мен жөнүндө ар кандай кептерди айткандарды Кудайга тапшырдым.

8-октябрда жоро-жолдошторум менен Жалал-Абад шаарында көк бөрү ойногонбуз. Оюнга берилип кетип каршы тарабымдагы оюнчуну байкабай калыптырмын. Аны менен кагылышып, чекемди жабыркатып алдым. Буюрса абалым жакшы. Бүгүн ооруканадан үйгө чыгам", - дейт ал.

Окуянын чоо-жайы:

"Элдик кабар" бөлүмүнө окурман куудул сабалды деген билдирүүсүн жөнөткөн. Ал так маалыматы жок экенин айткан.
Көп өтпөй эле Тынар Курбаналиев ден соолугу жакшы экенин, бир күн мурда улак ойноп жатып чекесин жарып алганын билдирген. Ал ооруканага барганда белгисиз бирөөлөр сүрөткө тартып алганын кошумчалаган.
10-октябрда куудулдун жакыны болом деген Болотбек Элмурат уулу видео кайрылуу жасаган. Ал элди Тынар Курбаналиев тууралуу далили жок маалыматтарга ишенбөөгө чакырган.