Социалдык тармактарда коомчулукту дүрбөлөңгө салган маалымат тарап жатат. Тагыраагы, "Кумтөрдө" тартылган видеого "Кыргыз өлкөсүндө Кытай жарандары иштеген аймак аныкталып, чет элдиктер жеген балдар табылды" деген аудио тиркелген. Тарап жаткан аудио боюнча Ички иштер министрлиги бүгүн, 14-январда билдирүү таратты.
"Социалдык тармактарда "кытайлар иштеген жерде алар жеген балдардын денеси табылды" деп тарап жаткан аудио чындыкка дал келбейт. Аудиодо тоолуу аймакта тартылган, топтолгон адамдардын ыйы угулган видео тиркелген. Бул видео 10-январда "Кумтөр" алтын кенинде тартылган. Тагыраак айтканда, дайынсыз болуп изделип жаткан эки жумушчуга жаназа окулган", - деп билдиришти басма сөз кызматынан.
Учурда милиция кызматкерлери жогорудагы маалыматты тараткан автордун ким экенин аныктоо үчүн бардык тиешелүү иш-чараларды көрүп жатат.