АФК Кубогу-2020: "Нефтчи" плей-офф баскычына автоматтык түрдө өттү

"Нефтчи" командасы АФК (Азия футбол конфедерациясы) Кубогунун тандап алуу оюндарында плей-офф баскычына чыкты. Бул тууралуу Футбол федерациясынан маалымдашты.

АФК "Нефтчи" командасынын атаандашы түркмөнстандык "Ахал" клубун оюндан четтетти. Буга себеп "Ахал" командасы Жалал-Абаддагы оюнду коронавируска байланыштырып келбей койгондугу болду. Бул чечим менен "Нефтчи" автоматтык түрдө плей-офф баскычына чыкты.

Буга чейин "Ахал" командасы 5-февралда Жалал-Абадда боло турчу оюнду башка күнгө жылдырууну суранып, АФКга кат жолдошкон.

"Нефтчи" командасынын тайпалык баскычка чыгуу үчүн эми "Худжанд" (Тажикстан) командасы менен ойнойт.

Бул эки команданын биринчи оюну 19-февралда Жалал-Абаддагы "Курманбек" стадионунда болуп, жооптук беттеш 26-февралда Душанбе шаарынын борбордук стадионунда өтөт.

Автор: Азат Бейшенбеков