Бүгүн миңден ашуун Казак жарандары Кыргыз өлкөсүнөн чыгып кетишти

7-8-февралда Казакстандан Кыргыз өлкөсүнө "Кең-Булуң" жана "Токмок" өткөрмө жайлары аркылуу көп адамдар өткөнү байкалган.

Өлкөгө кирген Казак жарандары бүгүн, 9-февралда артка кайтып жатышат. Бул тууралуу Мамлекеттик чек ара кызматынан билдиришип, саат 10:00гө карата алынган маалымат менен тааныштырат. Ага ылайык, Кыргыз өлкөсүнөн миңден ашуун Казак жараны чек ара аркылуу мекенине өтүп кетишти.

Учурда Кыргыз-Казак чек арасында абал туруктуу. Казакстан менен чектешкен аймактагы көзөмөл-өткөрүү жайлары штаттык режимде иштеп, жарандар жана транспорт каражаттары күндөгүдөй тартипте өтүп жатышат.

Окуянын чоо-жайы:

7-февралда Кыргыз-Казак чек арасына жакын Жамбыл облусунун Масанчи айылында жергиликтүү тургундардын ортосунда массалык мушташ орун алып, ок атышуу болгону кабарланган.

Кыргыз өлкөсүндөгү Токмок аймактык ооруканасына 17 Казак жараны медициналык жардам алуу үчүн кайрылган. Алар Масанчи айылында чыккан массалык мушташтан жаракат алгандарын билдиришкен.

Жаңжалдын кесепетинен 8 адам каза болуп, 40 жаран денесинен ар кандай жаракаттарды алганын өлкөнүн ички иштер министри маалымдаган. 9-февралда казак басылмалары каза болгондордун саны 10го жеткенин жазып чыгышты.

Автор: Бактыгүл Момбекова