Баткенде аялынын өлүмүнө шектелип жаткан жарандын иши сотко өттү

Баткен шаарында аялын өлтүрө сабаганга шектелген жарандын иши сотко өттү. Бул тууралуу SUPER.KG порталына Баткен ОИИБинен билдиришти.

Маалыматка ылайык, сотко иш 27-февралда жөнөтүлгөн.

"Иш сотко жөнөтүлдү. Азырынча соттук отурумдун датасы тактала элек", - деди басма сөз кызматынан.

Окуянын чоо-жайы:

4-январга караган түнү саат 01:00 чамасында Баткен облустук ооруканасына 1993-жылы туулган А.Н. аттуу тургундун жансыз денесин оорукананын жандандыруу бөлүмүнө жеткирилгенин кабарлашкан. Ыкчам тергөө тобу облустук ооруканага барып, маркумдун жансыз денесине кароо жүргүзүшкөн. Текшерүү учурунда маркумдун колу-буту күйүктөн улам, этинин териси шылынган жаракаты бар экени аныкталган. Текшерүү иштеринин жүрүшүндө, 3-январь күнү саат 18:30да Баткен шаарынын Базар-Башы кварталынын 1989-жылы туулган С.Ш. аттуу тургуну менен 7 жылдан бери чогуу жашаган аялынын ортосунда чыр чыгып, чырдын кесепетинен келин каза болгону аныкталган. Аталган факты Кылмыштардын жана жоруктардын бирдиктүү реестрине 130-берене (киши өлтүрүү) менен каттоого алынып, сотко чейинки өндүрүш иши башталган. Маркумдун жолдошу кылмышка тиешеси бар экени аныкталып, шектүү катары кармалган. Жубайлардын ортосунда 3 баласы болгон.

Автор: Айсалкын Качкынбекова