Чүйдө күйөөсүн өлтүрүп, өлүгүн жашыруу максатында бутуна кирпич байлап, каналга ыргытып салган аял 4 жылга эркинен ажыратылды

Чүйдүн Ысык-Ата районунда күйөөсүн өлтүрүп, өлүгүн жашыруу максатында бутуна кирпич байлап, Чоң Чүй каналына ыргытып салган аялга сот чечим чыгарды. Анда Ысык-Ата райондук соту айыпталуучуну төрт жылга эркинен ажыраткан. Бул тууралуу SUPER.KG порталына Чүй облустук сотунун басма сөз кызматынан билдиришти.

Маалыматка ылайык, шектүүгө дайындалган психиатриялык экспертизада аял кылмыш жасоо учурунда аффект абалында болгондугу аныкталган.

Окуянын чоо-жайы:

2019-жылдын 19-июнь күнү Ысык-Ата РИИБинин нөөмөт бөлүмүнө ӨКМнын кызматкерлери тарабынан маалымат түшкөн. Билдирүүдө кебетеси азиялык болгон, жашы 50-55 чамасындагы эркек кишинин жансыз денеси Кант шаарындагы Чоң Чүй каналынан табылганы айтылган. Ыкчам тергөө тобу аталган жерге барып Дмитриевка айылынын 52 жаштагы тургуну Б.А. экенин аныкташкан. Бул факты "адам өлтүрүү" беренеси менен Кылмыштардын жана жоруктардын бирдиктүү реестрине каттоого алынган. Соттук-медициналык экспертизалар дайындалып, шектүү катары маркумдун 44 жаштагы аялы кармалды. Алдын ала маалыматтар боюнча окуя аялы менен күйөөсүнүн ортосунда чыккан уруштан улам болгон. Аялы каза болгон жарандын өлүгүн жашыруу максатында бутуна кирпич байлап, Чоң Чүй каналына ыргытып салган.