Бишкекте мыйзамсыз куралды сактап жүргөн деген шек менен 14 жаштагы өспүрүм кармалды

Бишкекте мыйзамсыз куралды сактап жүргөн жаран кармалды. Бул тууралуу патрулдук милициянын басма сөз кызматынан билдиришти.

Маалыматка ылайык, 16-март күнү болжол менен саат 06:25 чамасында Бишкек ШИИББинин 102 кызматына 12-кичи райондо такси кызматынын айдоочу жардам сурап жатат деген маалымат келип түшкөн.

Айтылган дарекке милициянын кайгуул кызматы барганда айдоочу 12-кичи районунда ок атуучу курал менен кимдир бирөө жүргөнүн айткан. Ал эми кызматкерлер айтылган даректен шектүүнү аныкташкан. Ыкчам аракеттердин натыйжасында изи сууй электе 2006-жылы туулган жаран Л.К. шектүү катары кармалып, текшерүү учурунда жанынан бычак жана 4 даана ок табылган. Андан ары жарандын жашаган дарегине барып, үйүн текшергенде үйдүн ээси 1989-жылы туулган О.М. аттуу жаран экендиги такталып, үйүн тинтүү учурунда МА-АК 7,62 ок атуучу куралы 27 даана огу менен табылган. Мындан сырткары 5 даана калибр огу табылган.

Аталган факты Октябрь РИИБинин тергөө бөлүмүнө өткөрүлүп берилген. Учурда сотко чейинки өндүрүш иши жүрүүдө.

Автор: Айсалкын Качкынбекова