Кыргыз өлкөсү чек арадагы чыр боюнча Тажикстанга каршылык билдирүү нотасын жөнөткөн. Тажикстан буга жооп берди

Бүгүн, 9-майда Кыргыз Республикасынын Тышкы иштер министрлигине Тажикстан Республикасынын атайын жана ыйгарым укуктуу элчиси Назирмада Ализода чакырылган. Ал Мамлекеттик чек арадагы кыргыз-тажик участогунда 8-майда болгон чек ара чырына байланыштуу чакыртылганын ТИМден маалымдашты.

Ага ылайык, Кыргыз өлкөсүнүн аскер кызматкерлерине жана жарандарына карата гранатомет найлуу автоматтардан, анын ичинде топтук миномёттук куралдан бутага алып, ок атууга байланыштуу тажик дипломатына Кыргыз Республикасынын Тышкы иштер министрлигинин протест билдирүү нотасы тапшырылды. Ок атуунун натыйжасында, Кыргыз өлкөсүнүн чек ара кызматынын үч аскер кызматкери жана бир жергиликтүү тургуну оор жаракаттарды алышты.

"Тажикстандын аскер кызматкерлеринин жана жарандарынын Кыргыз-Тажик Мамлекеттик чек арасындагы кырдаалды туруксуздаштырууга алып келүүчү ачыктан-ачык деструктивдүү жана чагымчыл аракеттерине тынчсыздануу билдирилди. Тажик тараптын жогоруда аталган мыйзамга каршы аракеттери элдин биримдигин жана тынчтык менен бейпилдикти сактоонун символдору катары саналуучу Улуу Жеңиш майрамынын алдында жана Орозо айында болуп жатканы абдан эле өкүнүчтүү. Кыргыз тарап чек арага жакын райондордогу кырдаалдын курчушу үчүн бүткүл жоопкерчиликти толугу менен тажик тарапка жүктөйт жана кырдаалдын андан ары курчушун болтурбоо жана күнөөлүү адамдарды жоопкерчиликке тартуу максатында кечиктирилгис чараларды кабыл алууну талап кылат", - деп жазылат ТИМдин маалыматында.

Ошол эле учурда Тажикстандын Тышкы иштер министрлиги да ага жооп берген нота жолдогонун маалымдады. Анда жазылгандай, Кыргыз Республикасынын Тажикстандагы элчиси Жаныш Рустенбеков аталган өлкөнүн ТИМине чакыртылган.

"Ага тажик тараптан Кыргыз жарандары жана аскер кызматкерлери ок атышууга чейин жеткирген провокациялык аракеттерине каршылык нота берилди. Бул жаңжал Кыргыз жараны атайын эле курал менен ок атып, анын артынан Кыргыз чек арачылары буга аралашканы, мунун натыйжасында тажик тараптын чек арачылары аларга жооп берүүгө аргасыз болгондугу түшүндүрүлдү. Анын кесепетинен Тажикстандын 2 аскер кызматкери оор жаракат алып, ооруканада жатат. Буга байланыштуу кыргыз тарапка окуяга тиешелүүлөрдү аныктап, күнөөлүүлөрдү жоопко тартып, мындан ары мындай провокациялык окуяларга жол бербөө талабы коюлду", - деп жазылат Тажикстандын Тышкы иштер министрлигинин маалыматында.

Окуянын чоо-жайы:

2020-жылдын 8-май күнү Баткен облусунун Чек аймагындагы 50 сотых жер тилкеси үчүн кыргыздар менен тажиктердин ортосунда чыр чыккан. Аталган жер тилкеси изилденбеген аймакка кирет, бирок кыргыз тарап бул жер тилкесин пайдаланып келет. Жер тилкеси үчүн 30-40ка чукул кыргыздар менен 30-40тай тажиктер бири-бирине таш ыргытышып, уруш учурунда ок дагы атылган. Анын кесепетинен кыргыз тараптан 3 адам жабыркаган. Алардын абалы оор экени маалымдалган.