Президент манасчы Рысбай Исаков, акын Аалы Туткучев баштаган өнөр ээлеринин апаларын сыйлады

Нурислам Шерипбаевдин энеси Гүлзада Ботобекова.

Равшан Муминовдун энеси Лолохон Муминова.

Рысбай Исаковдун энеси Саадат Исакова.

Алмазбек Акчекеевдин энеси Гүлай Акчекеева.

Мырзайым Токтосунованын энеси Шохидахон Токтосунова.

Президент Сооронбай Жээнбеков ийгиликтерди багындырып, элге таанылган сыймыктуу уул-кыздарды тарбиялаган энелерди сыйлады. Бул туурасында президенттик аппараттын маалымат кызматынан билдиришти.

Маалыматка ылайык, өнөр ээлеринин апалары Энелер күнүнө карата куттуктоо, эстеликке белек алышкан. Энелерге куттуктоолорун жана белектерин президенттин аппаратынын кызматкерлери жана Талас, Ысык-Көл, Ош, Баткен облустарынын жетекчилери тапшырган.

Президент куттуктаган энелердин тизмеси:

- Төкмө акын, Кыргыз Республикасынын эмгек сиңирген артисти Аалы Туткучевдин энеси Сабира Туткучева;

- Эркин күрөш боюнча 23 жашка чейинки спортчулардын арасындагы дүйнө чемпиону Улукбек Жолдошбековдун энеси Гүлнар Абдраева;

- 2019-жылы АКШнын Нью-Йорк шаарында өткөн табигый-математикалык циклдагы предметтери боюнча эл аралык олимпиадада күмүш медалга ээ болгон Нурислам Шерипбаевдин энеси Гүлзада Ботобекова;

- 22-марттан бери коронавирус менен күрөштүн алдыңкы сабында жүргөн, жумушка өзүн толугу менен арнаган, эмгичекти туугандары менен жакындарын көрө элек Республикалык клиникалык инфекциялык оорукананын инфекционист-дарыгери Наталья Прыткованын энеси Ольга Прыткова;

- Мукаш Абдраев атындагы музыкалык мектептин окуучусу, Кыргызстан-Орусия эриш-аркак жылынын ачылышында ксилофондо ойноп чоң чеберчилик менен талантын көрсөткөн Мырзайым Токтосунованын энеси Шохидахон Токтосунова;

- Ички иштер органдарынын мурдагы кызматкери, 2010-жылдагы Апрель окуяларында жараат алып, анын кесепетинен эки бутунан ажыраган Алмазбек Акчекеевдин энеси Гүлай Акчекеева;

- Манасчы Рысбай Исаковдун энеси Саадат Исакова;

- Баткендин Лейлек районунда Кыргыз-Тажик чек арасындагы жаңжалда курман болгон Равшан Муминовдун энеси Лолохон Муминова;

Эске салсак, Кыргыз өлкөсүндө жыл сайын май айынын үчүнчү жекшембисинде Энелер күнү белгиленип келет.

Автор: Айзада Тураркулова