Бишкек-Ош жолунда унаа жарга аңтарылып түшүп, жараксыз абалга келген. Кырсыктан эки киши жаракат алды

Бүгүн, 29-май күнү Бишкек-Ош жолунда жол кырсыгы катталып, унаа жолдон чыгып, жарга кулап түшкөн. Окуя тууралуу Жалал-Абад облусунун Жол кыймылынын коопсуздугун көзөмөлдөө башкармалыгынын басма сөз кызматынан төмөнкүдөй маалымат беришти.

"Бүгүн саат 16:30 чамасында Токтогул РИИБине жол кырсыгы тууралуу маалымат келип түшкөн. Биздин ЖКККБнын кызматкерлери окуя болгон жерге барышкан. Бишкек-Ош жолунун 219-чакырымында кырсык орун алганы аныкталган. Маалыматтарга караганда, Аксы районунун тургундары бараткан Степвагон автоунаасы белгисиз себептерден жолдон чыгып, жарга түшүп кеткен. 15-20 метрге чейин унаа сүрүлүп барып аңтарылып кеткен. Айдоочунун айтымында, унаада 5 адам болгон. Алардан айдоочу менен бир жүргүнчү жаракат алып, Токтогул райондук ооруканасына жаткырылган. Ал эми калган эки жүргүнчү ошол эле учурда башка унаага түшүп, жолун улап кетишкен. Учурда окуя боюнча материалдар топтолуп, тергөө кызматына өткөрүлүп берилди", - деп билдирди басма сөз катчы.