Сабалып, үстүнө кайнак суу куюлуп каза болгон келиндин окуясы: Баткен райондук соту маркумдун күйөөсүнө карата чечим чыгарды

2020-жыл Баткендеги үй-бүлөлөрдүн бириндеги үрөй учурган окуя менен башталган болчу. Тактап айтканда, 3-январь күнү саат 18:30да Баткен шаарынын Базар-Башы кварталынын 1989-жылы туулган С.Ш. аттуу тургуну менен 7 жылдан бери чогуу жашаган аялынын ортосунда чыр чыгып, чырдын кесепетинен келин каза болгону аныкталган. Ыкчам тергөө тобу облустук ооруканага барып, маркумдун жансыз денесине кароо жүргүзүшкөн. Текшерүү учурунда маркумдун колу-бутунун эти жанчылып, териси күйүктөн улам шылынган жаракаттарды көрүшкөн.

Жергиликтүү маалымат каражаттарынын бири, күйөөсү аялын ала жипти аттаган деп ойлоп, аёосуз сабап, эсин жоготкондо үстүнө кайнак суу куйган деп жазган.

27-февраль күнү бул иш сотко жөнөтүлгөн болчу. Бүгүн, 9-июнда бул кылмышка шектүүгө карата соттун чечими чыкты. Баткен райондук соту соттолуучуну 15 жылга эркинен ажыратуу чечимин кабыл алганын Баткен облустук сотунан маалымдашты.

Окуянын чоо-жайы:

4-январга караган түнү саат 01:00 чамасында Баткен облустук ооруканасына 1993-жылы туулган А.Н. аттуу тургундун жансыз денесин оорукананын жандандыруу бөлүмүнө жеткирилгенин кабарлашкан. Ыкчам тергөө тобу облустук ооруканага барып, маркумдун жансыз денесине кароо жүргүзүшкөн. Текшерүү учурунда маркумдун колу-буту күйүктөн улам, этинин териси шылынган жаракаты бар экени аныкталган. Текшерүү иштеринин жүрүшүндө, 3-январь күнү саат 18:30да Баткен шаарынын Базар-Башы кварталынын 1989-жылы туулган С.Ш. аттуу тургуну менен 7 жылдан бери чогуу жашаган аялынын ортосунда чыр чыгып, чырдын кесепетинен келин каза болгону аныкталган. Аталган факты Кылмыштардын жана жоруктардын бирдиктүү реестрине 130-берене (киши өлтүрүү) менен каттоого алынып, сотко чейинки өндүрүш иши башталган. Маркумдун жолдошу кылмышка тиешеси бар экени аныкталып, шектүү катары кармалган. Жубайлардын ортосунда 3 баласы болгон.

Автор: Кызжибек Раимова
Фото: Турмуш.кж сайтынан алынды