Бишкектеги обсервацияда иштеп жүрүп каза болгон. Адинай Мырзабекова курман болгондон кийин "Эрдик" медалы менен сыйланды

Бишкектеги обсервациялардын биринде медайым катары иштеп жаткан студент Адинай Мырзабекова каза болгондон кийин "Эрдик" медалы менен сыйланды. Бул тууралуу бүгүн, 15-июлда президенттик аппараттын маалымат кызматынан кабарлашты.

"Президент Сооронбай Жээнбеков кол койгон жарлыкка ылайык, Иса Ахунбаев атындагы Кыргыз мамлекеттик медициналык академиясынын студенти Мырзабекова Адинай Замирбековна өз жанын аябай жасаган ыктыярдуу эмгеги жана коронавирустук инфекцияга (COVID-19) каршы күрөшүүгө кошкон салымы үчүн "Эрдик" медалы менен (курман болгондон кийин) сыйланды", - деп айтылат маалыматта.

Саламаттыкты сактоо министрлиги Кыргыз мамлекеттик медициналык академиясынын 5-курстун студенти 13-июль күнү каза болгонун маалымдаган. Ошондой эле мекемеден маркумдун өлүмүнүн себеби эки тараптуу пневмония болгон деген алдын ала маалымат беришкен. Президент Сооронбай Жээнбеков ыктыярчы медайым Адинай Мурзабекованын мезгилсиз дүйнөдөн кайткандыгына байланыштуу анын үй-бүлөсүнө жана жакындарына көңүл айткан.

Бүгүн, 15-июлда анын сөөгү Ысык-Ата районундагы айылда жерге берилди.

Автор: Бактыгүл Момбекова