Медицина илимдеринин доктору, профессор Жаныбек Мамбетов мезгилсиз дүйнөдөн кайтты

Медицина илимдеринин доктору, профессор Мамбетов Жаныбек Султанбаевич каза болду. Бул тууралуу укук коргоочу Рита Карасартова социалдык тармактагы баракчасына жазды.

"Мамбетов Жаныбек Султанбаевич байкем, медицина илимдеринин доктору, КММАнын Урология жана андрология кафедрасынын профессору. Канча адамдын кыйналганын жеңилдетип, ден соолугун чыңдаганга жардам берип, эми минтип өзү кетип калды.

Өлүмдүн катталуусу боюнча алдыңкы орунга чыгыптырбыз дегенди ар бирибиздин башыбызга жоготуу келгенде гана сезет окшойбуз. Дагы канча адамдын өмүрү кыйылышы керек? Канча мыкты дарыгерди жоготушубуз керек? Абалды колго ала турган, дарыгерлерге дем бере турган күн келеби же ээлеген ордуңардан куубасын деп орундугуңарга жабышып олтура бересиңерби?

Жаныбек байке, жашабайт белеңиз, кыргыз медицинасын алдыга сүйрөбөйт белеңиз, эмнеге кеткенге шаштыңыз? Жакында эле сүйлөшкөндө "баары жакшы" дебедиңиз беле.

Кыргыз өкмөтү ишмердүүлүгүңөрдүн көрсөткүчү адамдардын өлүмү, жалпы калктын санына эсептесе эң көп адамдарды жоготуп аткан өлкө болдук. Биринчи орунга чыктык. Бир нерсе кыласыңарбы?.." - деп жазган Рита Карасартова.

Автор: Азат Бейшенбеков