Ырды келиштире көркөм окуп, интернет жылдызына айланган Саян: “Тапшырма аткаргандан көрө ыр жаттаган жагат”

Социалдык тармактарда ырды жеткире көркөм окуп, көпчүлүктүн сүймөнчүлүгүнө айланган 8 жаштагы Саянды баарыбыз эле билсек керек. Буга чейин ал Алтынбек Исмаиловго таандык "Байка кыргыз, бир нерсе башталууда", Зайырбек Ажыматовдун калемине таандык “Мен кыргызмын” жана башка бир нече ырларды кичинекей болгону менен чоң акындардай чебердик жана берилүү менен окуганы интернетке желдей тарап, социалдык тармактын колдонуучуларын таң калтырган.

Саян Айтикеев SUPER.KG порталына бал тили менен кызыктуу маек курду.

- Саян, өзүң жөнүндө айтып берчи?

- Жаралган жерим Аксы экен,

Жаратылышы жакшы экен.

Туулган жерим Аксы экен,

Турпаты менен жакшы экен.

Алчалуу Аксы жерин,

Аталар кайдан тапты экен.

Мен Саян Айтикеев, Жалал-Абад облусуна караштуу Аксы районунун Ак-Жол деген айылынан болом. Бирок ата-энем менен бирге Ошто жашайм, ушул жактагы Алишер Навои атындагы №18 гимназия мектебинде 2-класста окуйм. Төрт бир туугандын экинчисимин.

- Ыр окуганда мааниси терең ырларды көп окуйсуң, аны түшүнүү сага кыйын эмеспи? Ыр жаттоого ким көбүрөөк жардам берет?

- Мен 4-5 куплет ыр болсо бир күндө жаттайм, 8-9 куплет болсо эки күндө жаттайм. Бирок Максат Жангазиевдин 12 куплет ырын 3 күндө эле жаттап койдум, мага жакса бат эле жаттап алам анан унутпай эстеп калам. Ырларды түшүндүрүп жаттаганга байкем, апам көп жардам берет.

- Көркөм окууга кандайча кызыгып калдың?

- Мага тапшырма аткаргандан көрө ыр жаттаган жагат. Апам тапшырма берсе, андан көрө бир ыр жаттайынчы деп суранам. Мектепте болсо жакшы окуйм. Мугалим эжеке ыр жаттагыла деп тапшырма берсе, дароо эле айтып берем. Биринчи байкем Зайырбек Ажыматовдун “Мен кыргызмын” деген ырын окучу, анан мен аны угуп жүрүп эле жаттап алдым, ошентип кызыгып калдым. Калган ырларды китептен окуп, бат эле жаттап алам. Ыр айтып атканда колдорду жаңсап айтканды алгач байкем көрсөтүп берди, анан мен аны туурап башка ырларды да мимикалар менен айтып калдым.

- Чоңойгондо ким болгуң келет? Эмнеге кызыгасың?

- Чоңойгондо акын болгум келет. Ат мингенге кызыгам, китеп окуганга да кызыгам. Компьютер ойногон дагы жагат.

- Кайсы акындарды тааныйсың, сага кимиси көбүрөөк жагат?

- Мен көп акындарды билем. Бердибек Жамгырчиев, Зайырбек Ажыматов, Алтынбек Исмаилов, Акбар Кубанычбеков жана башка. Мага Зайырбек Ажыматовдун ырлары жагат, көп ырын билем. Азыр Зайырбек Ажыматовдун “Жүрөктөгү бороон” деген китебин окуп жатам. Мага жай ырлар туура келбей калат, андан көрө мекен жөнүндө, эне тууралуу ырларды жакшы окуйм.

Байкеси Мунарбек Базаркуловдун айтымында, Саян дилгир бала. Өзү болгону 2-класстын окуучусу болсо дагы китепти чоң кишилердей эле окуйт. Анан дагы телеканалдарга барып маек курганды жакшы көрөт. Ыр окуп берчи деп сурангандарга такыр уялбастан эле шатыратып айтып кирет деп кошумчалады.