51 Кыргыз жараны жабыркаган Орусиядагы көпүрө кырсыгы боюнча кылмыш иши козголду

Орусиянын Москва облусунун Ступино районундагы "FM LOGISTIC" логистикалык ишканасында жөө адамдар өтүүчү көпүрө кулап, 51 Кыргыз жараны жабыркаган кырсык боюнча кылмыш иши козголду. Бул тууралуу Орусиянын Тергөө комитетине таянып, аталган өлкөнүн басылмалары жазып чыгышты.

Алдын ала териштирүү иш-чараларынын натыйжасында, Орусиянын Кылмыш-жаза кодексинин 143-беренесинин 1-бөлүгү ("эмгекти коргоо талаптарын бузуу, этиятсыздыктын кесепетинен адамдардын ден соолугуна оор зыян келтирүү") менен кылмыш ишин козгоо чечими кабыл алынган.

"Орусиянын Тергөө комитетинин төрагасы Александр Бастрыкин Ступиного борбордук аппараттын криминалисттерин жиберди. Жакынкы аралыкта окуя болгон жерди текшерип башташат. Тергөө бардык жагдайды жана жумушчулардын массалык түрдө жаракат алган себебин аныктап чыкмакчы", - деп айтылат маалыматта.

Эске салсак, 27-сентябрь күнү Москва облусунун Ступино районундагы "FM LOGISTIC" логистикалык ишканасында жөө адамдар өтүүчү көпүрө урап, 51 Кыргыз жараны жабыркаган. Анын ичинен жаракат алган төрт кыргыз мигранты оор абалда ооруканага жеткирилген. Бактыга жараша, каза болгондор катталган эмес.

Ал эми бул окуяны Кыргыз өлкөсүнүн Орусиядагы элчиси Аликбек Жекшенкулов жеке көзөмөлүнө алган.

Автор: Гүлзина Каныбекова