Эне тилге эки мүнөт: "Куу чирен, жөө манаптардан колхозчубуз азырынча куру эмес". Куу чирен деген эмне?

"Эне тилге эки мүнөт" рубрикасынын бул жолку чыгарылышында фразеологизм сөздөрүнүн маанисин эл аралык Кувейт университетинин лингвистика жана социалдык гуманитардык илимдер кафедрасынын доценти Гүлнур Жамалбекова түшүндүрүп берди.

1. Куу чирен - курулай жасанган, сылан короз, мактанчаак, колунан эч нерсе келбесе да кекирейип басып жүргөн, кербез. Мисалы: Куу чирен, жөө манаптардан колхозчубуз азырынча куру эмес. (А.Убукеев)

2. Тоң моюн - тил албаган, айтканга көнбөгөн, көңүл коюп иштөөнү каалабаган, кежир адамдардын мүнөзүнө карата айтылган. Мисалы: Кантейин! Ушундай тоң моюн болгонуң жаман. (К.Каимов)

3. Кол ийрисине тартуу - Жакындарына, өз дегендерине, тууган-туушкандарына, жакын санаалаштарына жан тартуу, аларга мурдараак, көбүрөөк, жакшыраагын берүү. Мисалы: Сен ошол кедейлердин тобунун башчысы экениңен пайдаланып, кол ийрисине тартат кылып, өзүңө көбүрөөк алып койдуң. (К.Эшмамбетов)

Автор: Гүлдана Мамадали кызы