Пакистан 4 медициналык окуу жайды "жашыл тизмеге" киргизгенин министрликтен тастыкташты

Пакистан 4 медициналык окуу жайды "жашыл тизмеге" киргизди. Бул тууралуу Билим берүү жана илим министрлигинин басма сөз кызматынан билдиришти.

Маалыматка ылайык, Билим берүү жана илим министрлиги Кыргыз Республикасынын Пакистандагы элчилиги жана Пакистандын Кыргыз өлкөсүндөгү элчилиги менен биргеликте жасаган комплекстүү иштеринин жүрүшүндө 4 медициналык окуу жай жашыл тизмеге кирди.

Алар:

И.Ахунбаев атындагы Кыргыз мамлекеттик медициналык академиясы;
Ош мамлекеттик университети;
Кыргыз-Орус (Славян) университети;
Эл аралык жогорку медициналык мектеби.

"Министрлик тарабынан иштелип чыккан "жол картасына" ылайык, экинчи этапта министрлик өлкөдөгү медициналык окуу жайлардын учурдагы абалын аныктаган соң Пакистан медициналык кеңешине айрым медициналык ЖОЖдорду кайрадан "жашыл тизмеге" киргизүү сунушу жөнөтүлөт.

Кийинки этапта пакистандык комиссия Кыргыз өлкөсүнө чакырылат. Комиссия өлкөдөгү бардык медициналык окуу жайларды караган соң талаптарга жооп берген медициналык ЖОЖдорду жашыл тизмеге киргизүү маселеси каралат", - деп айтылат министрликтин маалыматында.

Кечээ, 17-ноябрда Пакистандын басылмалары Кыргыз өлкөсүндөгү 4 медициналык ЖОЖдорду кара тизмеден чыгаргандыгын жазып чыккан.

Буга чейин Пакистан Кыргыз өлкөсүндөгү медициналык окуу жайларды кара тизмеге киргизгени айтылган.