"Ош базарынын" аймагында мас абалда аялды бычак менен коркутканга шектелген жаран кармалды

Бишкектеги "Ош базарынын" аймагынан мас абалда аялды бычак менен коркутканга шектүү жаран кармалды. Бул тууралуу Ленин райондук ички иштер башкармалыгынын басма сөз кызматынан билдиришти.

"2020-жылдын 10-декабрында Ленин РИИБине Н.О. аттуу жаран арыз менен кайрылган. Арызында ошол эле күнү саат 15:00 чамасында "Ош базарынын" аймагында мас абалында, уят сөздөрдү сүйлөп, кийимин айрып, бычак менен коркуткан белгисиз жаранга чара көрүү өтүнүчү менен кайрылган. Ошондой эле ал арыз ээсинин 3 миң сомдук күрмөсүнүн жеңин айрып, белгисиз тарапка качып кеткен.

Ыкчам издөө иш-чараларынын жүрүшүндө кылмышка шектүү делинип 1995-жылы туулган А.Т. аттуу жаран кармалган. Шектүү эки айга СИЗО-1ге киргизилди", - деп жазылат билдирүүдө.

Учурда сотко чейинки өндүрүштүн алкагында тергөө иш-аракеттери жүргүзүлүүдө.

Автор: Азат Бейшенбеков