Бүгүн, 24-декабрь, күнгө бейшемби. Күндөгүдөй эле бул күн да саясий окуяларга, жаңылыктарга бай болду. Алардын баарынан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун сунуш кылат.
УКМКнын төрагасы маалымат жыйынын өткөрдү
Бүгүн Улуттук коопсуздук боюнча мамлекеттик кызматтын төрагасы Камчыбек Ташиев маалымат жыйын өткөрдү. Жыйында төрага көптөгөн маселелер боюнча сөз кылып, журналисттердин бир нече суроолоруна жооп берди. Алсак, жакында эле пандемия шартына карабай, 1000 киши чакырып той берген ишкер Жалил Атамбаевдин УКМКда иштеген уулуна катуу сөгүш берилгенин, "Женго" каймана аты менен белгилүү Кадыр Досоновго издөө жарыяланганын, мурдагы өлкө башчысы Алмазбек Атамбаевдин абалы жакшы эмес экенин жана башка бир нече маселелер тууралуу айтты.
Мындан сырткары Ташиев жакында Жогорку Кеңештин депутаты кармалганын билдирди.
"Мен муну айтпай коё албайм. Аты-жөнү айтылбайт. Бирок ал 8 жыл мурун кылган өтө чоң кылмыш иши үчүн азыр мамлекетке чоң суммадагы акчаны төлөп жатат. Биз ага ушундай шарт койгонбуз. Азыр ал жарымын төлөп бүтүп калды", - деди Ташиев.
Камчыбек Ташиевдин маалымат жыйынын толугу менен ушул шилтеме аркылуу өтүп көрө аласыз.
Жогорку Соттун төрайымына кылмыш иши козголду
Камчыбек Ташиев маалымат жыйынында айткан дагы бир чуулгандуу маалымат Жогорку Соттун төрайымы Гүлбара Калиевага карата кылмыш иши козголгону болду.
Анын айтымында, тергөө иштеринде анын күнөөсүн аныктаган жетиштүү далилдер бар.
"Биз материалдарды соттор кеңешинин алдындагы тартип комиссиясына тапшырдык. Эгер алар чечим кабыл алышып, Жогорку Соттун төрайымын жоопко тартабыз десе, биз аны жогорку кызматына карабастан эртең деле камакка алабыз. Ал мыйзамды бузуу менен мамлекетке зыян келтирген. Бирок мен деталдарын айта албайм", - деди Камчыбек Ташиев.
Ташиевдин айткандарына Жогорку Соттун басма сөз кызматы жооп берип, күнөөсү далилденип, соттун чечими чыкмайынча адам күнөөсүз деп эсептелерин белгиледи.
"Сот бийлиги акыркы күндөрү аткаруу жана мыйзам чыгаруу бийлигинин өкүлдөрү тарабынан конструктивдүү эмес сын-пикирлер менен айыптоолорго дуушар болуп, алар сотко чейинки текшерүү жүргүзүлүп жаткан маселелерди коомдук талкууга алып чыгууда. Сот тутумунун өкүлдөрүнө карата айыптоолор акыры анын беделин түшүрүүгө алып келет. Мындай көрүнүштөр элдин сот тутумуна болгон ишенимин төмөндөтүп, учурдагы мыйзамдарга каршы келерин билдирет", - дешти Жогорку Соттон.
Садыр Жапаровдун жактоочусу президенттик аппаратка кызматка орношту
Президенттик аппараттын басма сөз кызматынан билдиргендей, Замирбек Базарбеков президенттик аппаратка кызматка орношту.
Президенттин милдетин аткаруучу Талант Мамытов кол койгон жарлыкка ылайык, Базарбеков Замирбек Курамаевич президенттик аппараттын соттук реформа жана мыйзамдуулук бөлүмүнүн башчысы болуп дайындалды.
Замирбек Базарбеков 1957-жылы Жалал-Абад облусуна караштуу Токтогул районунун Үч-Терек айылында туулган. 1989-жылы Жусуп Баласагын атындагы Кыргыз улуттук университетинин юридикалык факультетин аяктаган. Базарбеков президенттикке талапкер Садыр Жапаровдун жактоочусу болуп жүргөнү белгилүү.
Коопсуздук кеңешинин жыйыны өттү
Президенттин милдетин аткаруучу, Жогорку Кеңештин төрагасы Талант Мамытов өлкөнүн Коопсуздук кеңешинин кезектеги жыйынын өткөрдү. Президенттик аппараттан билдиришкендей, жыйында президенттик шайлоону өткөрүү учурунда коомдук жана эпидемиологиялык коопсуздукту камсыз кылуу маселеси, ошондой эле Кыргыз Республикасынын стратегиялык объектилеринин тизмесине сунуштамалар каралды.
Мамлекет башчысынын милдетин аткаруучу өз сөзүндө 2020-жылы Кыргыз мамлекети бүтүндөй дүйнө жүзүндөй эле кыйын жана трагедиялык окуяларга туш болгондугун айтат.
"Пандемиянын аркасында мамлекеттин бардык олуттуу көйгөйлөрү ачыкталды. Тилекке каршы, биздин 79 миңден ашык жараныбыз ооруга чалдыкты, алардын ичинен 1300дөн ашык адам коронавирустук инфекциядан улам каза болду. Терең кайгыруу менен биздин элдин чексиз кайгысын тең бөлүшөм", - дейт Талант Мамытов.
Талант Мамытов азыркы учурдагы негизги милдеттердин бири - президенттик шайлоону жана мамлекеттик башкаруу формасын аныктоочу референдумду өткөрүү экендигине токтолуп, 5-6-октябрь күндөрдөгү парламенттик шайлоонун адилетсиз жыйынтыгынан улам элдик толкундоолорго жана бийликтин алмашуусуна алып келген окуялардан сабак алуу керек экендигин белгиледи.
