Садыр Жапаров Эрмек Нургазиевди Бишкектин мэри кызматына коюу оюнан кайттыбы?

Жаңы дайындалган калаа башчысынын милдетин аткаруучу Эрмек Нургазиев кызматтан алынганы айтылууда.

Бул боюнча президент Садыр Жапаров социалдык тармактагы баракчасына жазып чыкты.

"Албетте, таза, жаш, идеялуу кадрлар көп. Маектеше келсең жүзү жарык, иштемчил көрүнөт. Мурда-кийин бийликте иштебеген, коррупциялык иштерге аралашпаган деп тандаган кадрлардын артында да хулигандык, мүлк талаш иштери бар экен. Ошондуктан шаардын мэрлигине коюуга мүмкүн эмес", - деп жазып калтырган.

Бул маалыматты тактоо максатында шаардык мэриянын басма сөз кызматына байланышканыбызда маалымат такталып жатканын айтты.

Кечээ, кечинде мэрдин милдетин аткаруучу Балбак Түлөбаевдин кызматтан кеткендиги маалым болгон. Бүгүн, 9-февралда эртең менен бул орунга Эрмек Нургазиев келип, маалымат жыйын да берүүгө үлгүрдү. Анын жүрүшүндө ал баш калаанын башчылыгына президент Садыр Жапаровдун айланасындагы адамдар түрткү болгонун айткан. Ошондой эле ал Жапаровдун өзү менен 2 жолу жолугушуп, пландарын айтканын кошумчалаган.

Бул арада ЖМКлар Эрмек Нургазиев коомчулукка аял киши менен жаңжалдашып жаткан видеосу менен көбүрөөк белгилүү экенин жарыялап жатышты. Бул чыр боюнча Нургазиев журналисттердин суроосуна жооп берип, "Мен аны жооп катары чапкам" деди.