Акимдин маалыматына ылайык, 24-26-март күндөрү Ташкентте Кыргыз өлкөсү менен Өзбекстандын өкмөттүк делегацияларынын жолугушуусунда ушундай чечим кабыл алынган.
Буга чейин УКМКнын төрагасы Камчыбек Ташиев Сох анклавын Өзбекстандын негизги аймагы менен байланыштырган эки чек ара өткөрмө бекеттери ачылганын билдирген. Алар Өтүкчү жана Кайтпас чек ара бекеттери.
Сох-Риштан жолу 2013-жылы Сох анклавына жакын Кыргыз-Өзбек чек ара тилкесинде болгону 2 күнгө гана ачылып, кайрадан жабылган. Анын натыйжасында, Сох анклавынын тургундары Өзбекстандын негизги аймагына барып-келүү үчүн 80 чакырымдай жол басып Кыргыз өлкөсүнүн Кызыл-Кыя шаарына жакын жайгашкан чек ара өткөрмө бекети аркылуу бир топ жерди айланып өтүшчү.
УКМКнын төрагасы, чек араларды тактоо боюнча өкмөттүк комиссиянын башчысы Камчыбек Ташиев бул жолдогу көпүрөдөн өтүүгө 20 жүргүнчүдөн ашпаган чакан автобустарга гана уруксат берилип, чоң жүк ташуучу унаалар өткөрүлбөй турганын билдирген.
