Ысык-Көлдөгү Каракол суусунун жээги курулуш таштандыларынан тазаланды

Ысык-Көл облусундагы Каракол шаары менен Бөрү-Баш айыл аймагынын ортосундагы Каракол суусун бойлой ташталган таштандылар тазаланды. Бул тууралуу өкмөттүн Ысык-Көл облусундагы ыйгарым укуктуу өкүлчүлүгүнөн билдиришти.

Билдирүүгө ылайык, аталган жерди тазалап, суунун нугун багыттоого облустук, шаардык жана Ак-Суу району боюнча керектүү техникалар жана кызматкерлер биргеликте катышты.

"Аталган жерге бир канча жылдан бери курулуш жана күнүмдүк таштандылар таштала берип, узундугу 1 чакырымдан ашкан таштанды таштоочу жайга айланып калган.

Тиешелүү кызматтын өкүлдөрү тазалагандан кийин мындан ары мындайга жол бербөө максатында атайын шлагбаум коюлуп, чектөө чаралары каралды", - деп жазылат мекеменин маалыматында.