Жети-Өгүзгө бара жаткан жубайлар жол кырсыгынан каза болду
Кырсык, 2021-жылдын 14-январь күнү Бишкек-Торугарт унаа жолунда болгон. Анда эки унаа сүзүшүп, анын кесепетинен эки адам каза болуп, бир адам жаракат алганы кабарланган.
Ысык-Көл облусуна бара жаткан Мерседес-Бенц унаасынын айдоочусу карама-каршы тилкеге чыгып, Мерседес унаасы менен сүзүшкөн. Белгилүү болгондой, каза болгон эки жаран аялы-күйөөсү болгон. Анда 35 жана 34 жаштагы жубайлар Ысык-Көлдүн Жети-Өгүз районуна бара жатышкан.
Ырчы Анжелика кабылган жол кырсыгы
23-январда ырчы Анжелика жол кырсыгына кабылып, анын кесепетинен өзү жана кыздары жаракат алган. Кырсык Балыкчы-Ананьево унаа жолунда катталган.
Белгилүү болгондой, унаада ырчы кыздары жана курбусу менен бара жаткан. Рулда ырчынын курбусу болгон. Айдоочу рулга ээ боло албай жолдон чыгып, бакты сүзгөн. Кырсыктын кесепетинен ырчы жана анын 5 жаштагы кызы жаракат алып, Түп райондук ооруканасына жеткирилген.
24-январда ырчыга шашылыш операция, 25-январда 5 жаштагы кызына операция жасалган. Кийинчерээк, ырчынын улуу кызы Айымага да операция жасалары күтүлүп жатканы белгилүү болгон. 10-февралда ооруканадан үйүнө чыгарылган ырчы 2 ай балдак менен жүрүп, учурда абалы жакшы.
"Тазалыктын" жумушчусун атайын жарык чагылдыруучу кийимдерди кийип турганына карабай сүзүп кеткен
Ушул жылдын 24-февраль күнү Бишкекте "Тазалык" муниципалдык ишканасынын 37 жаштагы жумушчусун унаа сүзүп кеткен. Ошол күнү таң атпай болжол менен саат 06:30 чамасында белгисиз айдоочу унаасы менен Каралаев көчөсүнөн түштүк тарапка бара жаткан жолдо 1983-жылы туулган аялды сүзүп кеткен. Анын кесепетинен жаран денесинен жаракат алып, Бишкек шаардык Травматология жана ортопедия илим изилдөө борборуна жаткырылган.
Бул факты Кылмыштардын жана жоруктардын бирдиктүү реестрине катталып, окуя болгон жерден из жашырган айдоочу кармалган.
"Тазалык" муниципалдык ишканасынын Мадина Токобаева аттуу жумушчусу апасы Жылдыз Орозалиева менен бирге Каралаев жана Суеркулов көчөлөрүнүн кесилишинде жөө адамдар өтүүчү жолду шыпырып жатышкан. Эки кызматкер тең атайын чагылдыруучу кийимдерди кийип турганына карабастан, катуу ылдамдыкта келе жаткан кара түстөгү BMW үлгүсүндөгү унаа Мадина Токобаеваны сүзүп кеткен.
Жаракат алган жумушчунун апасынын айтымында, унаанын катуу үнүн угуп ал чуркап барганда кызынын бети-башы кан болуп, эс-учун жоготкон абалда жаткан. Ал унаанын номерин көрүүгө жетишпей калганын, айдоочу болсо качып кеткенин айткан.
"Бактыга жараша, жабырлануучу "Тез жардам" унаасынан эсине келген. Анын баш мээси чайкалып, буту сынган, сол бети жабыркап, жүзүндө көп тактар бар. Кырсыктан кийин айдоочунун Фархад аттуу тууганы ооруканага келип, Мадина Токобаеванын дарылануусуна жарым-жартылай каражатын төлөп берген. Ал эми унааны башкарып бара жаткан 17 жаштагы жигит болгон. Жаракат алган кызматкерге материалдык жардам көрсөтүлдү. 1-мартта мэрдин милдетин аткаруучу Бактыбек Кудайбергенов жана вице-мэр Жамалбек Ырсалиев ооруканага барып жарадар болгон жумушчуну көрүп келишти. Учурда анын абалы канааттандырарлык, өз алдынча отуруп калды", - деп билдиришкен Бишкек шаардык мэриядан.
"Тез жардам" унаасынын катышуусунда жол кырсыгы катталып, 37 жаштагы аял менен 3 жаштагы кыз каза болгон
15-март күнү түшкө маал
Бишкек-Нарын-Торугарт унаа жолунда "Тез жардам" кызматы кырсыкка кабылганы маалым болгон. Анда "Тез жардам" кызматы Токмоктон Кемин районун көздөй бара жатып, Toyota Estima үлгүсүндөгү унаа менен сүзүшүп, андан кийин Honda Inspire унаасы менен кагышкан.
Toyota Estima унаасы катуу соккудан улам Audi унаасын барып сүзгөн. Алдын ала маалыматтар боюнча, кырсыктан Honda Inspire унаасынын жүргүнчүлөрү болгон 37 жаштагы аял жана 3 жашар кыз каза болгон. Дагы бир адам жаракат алган.
КамАЗ менен Баткенге концерт койгону бара жатып каза болгон ырчы
29-мартта Бишкек-Ош унаа жолунда унаа оодарылып кетип, Куралдуу күчтөрдүн катарында кызмат өтөп жаткан жоокер каза болгону кабарланган. Кийинчерээк бул жол кырсыгынан Куралдуу күчтөрдүн оркестринде ырдап жүргөн аял каза болгондугу белгилүү болгон. Ырчы айым Нурзат Ажыгожоеванын артында 3 баласы жана жолдошу калды.
Бишкек-Ош унаа жолунун 159-чакырымында КамАЗ-Вахтовка үлгүсүндөгү унаанын айдоочусу рулду башкара албай, унаа жолдон чыгып оодарылып кеткен. Жол кырсыгынын кесепетинен аял каза болуп, 5 адам ар кандай жаракаттарды алышкан. Белгилүү болгондой, аталган кырсыктан ырчы Нурчолпон, кыл кыякчы Залина Касымова, ырчы Бурулча Турарбек кызы, ошондой эле "Сармерден" берүүсүнүн алып баруучусу Талант Карагулов да болгон.
Орусиядан Кыргыз өлкөсүнө 7 унааны жүктөп келе жаткан Трал өрттөнүп, унаалар толугу менен күйүп кеткен
3-апрелде Чүй облусунун Сокулук районундагы Күн-Туу айылында 7 унааны жүктөп келе жаткан Трал өрттөнүп, унаалар толугу менен күйүп кеткен.
Өрттөнүп кеткен унаалардын чыгымы 65 миң долларды түзгөнүн айдоочу Белек Аттокуров айтып берген. Анын айтымында, унаалар Орусиядан Кыргыз өлкөсүнө ташылып келе жаткан. Алар Хонда Фит, Хонда Стэпвагон, Тойота Альфард жана Тойота Камри үлгүсүндөгү унаалар болгон. Айдоочу өрттөнүп кеткен унаалардын ээлеринен кечирим сурап, Тралды бөлөсү экөө карызга алганын билдирген.
"Өзүм Бишкекте жашайм, 3 балам бар. Кырсык болуп, күтүлбөгөн жерден унаалар токтотуучу жайга жетпей күйүп кетти", - деген ал.
Кудум тасмадагыдай. Велосипедчен адамды жөө өтмөктөн учура сүзгөн видео
Буга чейин Бишкекте велосипедчен адамды жеңил унаа жөө адамдар өтүүчү өтмөктөн учура сүзгөн видео жарыяланган. 19-апрель күнү Хонда Одиссей унаасы Түштүк магистраль көчөсү менен чыгышка карай бара жатып, Токтоналиев көчөсүнүн кесилишинен Mercedes-Benz унаасын сүзгөн. Андан кийин Одиссей магистраль көчөсү менен батыш тарапка бара жатып, велосипедчен адамды сүзгөн. Жол кырсыгынан 1 киши жабыркап ооруканага жеткирилгени белгилүү болгон.
