Баткендин Көк-Таш айылындагы кырдаал. Баткен ОИИБи маалымат таратты

Баткен районундагы Ак-Сай айыл аймагына караштуу Көк-Таш айылындагы бүгүнкү кырдаал.

Бүгүн, 29-апрель күнү таңкы саат 05:45 чамасында Баткен районунун Көк-Таш айылында жайгашкан аскер бөлүгүнө тажик жарандары тарабынан ок атуучу курал менен ок атылып, ошол айыл аркылуу өтүүчү Ош-Исфана жолунун боюнда жайгашкан Тажик Республикасынын Майский айылы тараптан жолдон өткөн унааларга таштар ыргытыла баштаган. Бул тууралуу Баткен ОИИБинин басма сөз кызматынан билдиришти.

Бул факты Баткен РИИБинде Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

Тажик тарап аткан октон Баткен районунун Көк-Таш айылынын 30 жаштагы тургунунун оң көзүнө ок тийип, жергиликтүү айылдык ооруканага түшкөн. Бул жагдай Баткен РИИБинде "киши өлтүрүүгө аракет кылуу" беренеси менен катталып, сотко чейинки өндүрүш иши башталды.

Азыркы учурда Көк-Таш айыл элинин коопсуздугун сактап, абалды турукташтыруу максатында милиция кызматкерлери күчөтүлгөн тартипте иш алып барууда.

Автор: Айсалкын Качкынбекова
Фото: Баткен ОИИБи