Депутат Аалы Карашев: "Акимдерди ротация кылуунун оң жагы абдан көп". АПТАСОБОЛ

Президент Садыр Жапаров өлкөдөгү райондордун акимдерин ротациялады. Мамлекет башчы кол койгон жарлыктарга ылайык, мамлекеттик администрациялардын башчылары - облустардагы райондордун акимдери дайындалды жана бошотулган. Жарлыкты ишке ашыруунун алкагында атайын түзүлгөн аттестациялык комиссия тарабынан жалпы республика боюнча жергиликтүү мамлекеттик администрациялардын башчылары аттестациядан өткөрүлдү. Мамлекеттик кадр кызматы аймактык кадрлар резервине талапкерлерди тандоодон өткөрдү.

SUPER.KG порталы "Бул кадамдын кандай кемчилиги жана артыкчылыгы бар?" деген собол салды.

Жогорку Кеңештин депутаты Аалы Карашев акимдерди ротация кылуунун оң жагы абдан көп экенин айтты.

"Бул президенттин жаңы кадр саясаты жөнүндө жарлыгынын негизинде болуп жатат болуш керек. Ошонун жыйынтыгында ишке ашып жатат го деп ойлойм. Эгемендүү өлкө болгондон кийин масштабдуу мындай ротация болгон эмес. Ротация бир мезгилде болчу эмес. Бул кадамдын артыкчылыгы Кыргыз мамлекетинин биримдиги, ынтымагы, бүтүндүгүн сактоо. Тажрыйба алмашканга шарттар түзүлөт. Аймактык резерв түзүлгөнү, акимдердин аттестациядан өтүшү жакшы.

Жерине барганда кадрлардын иштөөсүнө бут тосуулар болбой, сый-урмат менен иштөөсүнө шарт түзүп берүү керек. Ошол жагынан катуу көңүл буруу зарыл", - дейт Карашев.

Автор: Жылдыз Джускембаева