Жогорку Кеңеш "Маалыматты манипуляциялоо жөнүндө" мыйзам долбоору боюнча макулдашуу тобун түздү

Жогорку Кеңеш "Маалыматты манипуляциялоо жөнүндө" мыйзам долбоору боюнча макулдашуу тобун түздү. Бул боюнча чечим бүгүн, 2-июнда парламенттин жыйынында кабыл алынды.

Долбоордо интернет колдонуучулардан баштап сайттын кожоюндарынын, интернет-провайдерлердин укук-милдеттери жазылган. Эгерде кандайдыр бир сайтка же баракчага чындыкка дал келбеген маалыматтар жарыялана турган болсо, өкмөт дароо блокко салат жана ал жоопко тартылат.

Мыйзам долбоорун кароо түшкү танапистен кийин уланат.

Эске салсак, былтыр, 25-июнда парламентте "Маалыматты манипуляциялоо жөнүндө" мыйзам долбоору каралып, ал колдоо тапкан. Долбоорго карата 79 депутат "макул" деп, 10 эл өкүлү "каршы" добуш берген. Аталган мыйзам коомчулук тарабынан терс кабыл алынып, бул сөз эркиндигине каршы келген мыйзам катары кабылданган.

Былтыр, 3-сентябрда ошол кездеги өлкө башчы Сооронбай Жээнбеков Жогорку Кеңеш тарабынан кабыл алынган "Маалыматты манипуляциялоо жөнүндө" мыйзамына карата каршы пикирге кол койгону маалым. Мыйзамга ылайык, өлкө башчынын мыйзам долбооруна карата каршы пикири кайрадан Жогорку Кеңеште каралышы боюнча сунуштоо берилген.

Автор: Жылдыз Джускембаева