Катамаран жээкке чыга албай калган. Ысык-Көлдө 17 жаранга жардам көрсөтүлдү

Ысык-Көлдө катамаран менен алыска сүзүп, кайра жээкке чыга албай калган жарандарга жардам берилди. Өзгөчө кырдаалдар министрлигинин маалыматына ылайык, жалпы 17 жаран куткарылды.

"Тамчы айылында 5 катамаранды шамал жээктен 3 чакырым алыстыкка учуруп, жээкке чыга албай калган. Катамаранда 17 жаран (аты-жөндөрү такталууда) болгон. Ошондой эле 1 кайык калып калгандыгы тууралуу маалымат нөөмөт бөлүмгө түшкөн.

Жерине 3 куткаруучу, 3 суучул кайык менен тартылып, 5 катамарандагы 17 жаранды жана калып калган кайыкка күйүүчү май куюп, көлдүн жээгине чыгарышкан. Куткарылган жарандардын абалдары канааттандырарлык", - деп айтылат билдирүүдө.

Автор: Бактыгүл Момбекова
Фото: ӨКМнын басма сөз кызматы