Саясат таануучу Токтогул Какчекеев: "Орхан Инандынын Түркия тараптан кармалышы Кыргыз мамлекетинин аброюн, Конституциясын, мыйзамдарын тебелегенге барабар". АПТАСОБОЛ

Кыргыз жараны Орхан Инанды ушул жылдын 1-июнунан бери дайынсыз болуп жаткан. Түркиянын президенти Режеп Тайип Эрдоган министрлер кабинетинин отурумунда сөз сүйлөп жатып буга чейин дайынсыз жоголду деп жаткан Орхан Инанды атайын операциянын негизинде колго түшүрүлүп, Түркияга алып келингенин кабарлаган.

Мындан улам SUPER.KG порталы "Режеп Тайип Эрдоган Орхан Инанды кармалып, Түркияга алып келингенин билдирди. Кыргыз тарап кандай аракет көрүшү керек?" деген собол салды.

Саясат таануучу Токтогул Какчекеев Орхан Инандынын Түркия тараптан кармалышы Кыргыз мамлекетинин аброюн, Конституциясын, мыйзамдарын тебелегенге барабар деген пикирин айтты.

"Атуулдардын жашоо-турмушунун коопсуздугу боюнча өлкөнүн Конституциясында бекитилген. Орхан Инанды Кыргыз өлкөсүнүн жараны болуп эсептелет. Түрк тарап биздин эгемендүүлүктү көзгө илбей, бизден операция түрүндө Орхан Инандыны уурдап кеткени Кыргыз мамлекетинин аброюн, анын Конституциясын, мыйзамдарын тебелегенге барабар. Тышкы иштер министрлиги Түркиянын элчисин чакырып, түшүндүрүүнү талап кылуусу керек. Аталган министрлик Түркияга нота жөнөтүшү шарт. Аны кайтарып берүүнү, мыйзамды бузгандыгы үчүн Кыргыз мамлекетинен кечирим суроону өтүнөм деп кайрылышы керек", - дейт ал.

Автор: Жылдыз Джускембаева