"Токио-2020": Атабек Азисбеков 2:10 эсебинде жеңилүү ызасын тартты

Грек-рим күрөшү боюнча кыргыз балбаны Атабек Азисбеков "Токио-2020" жайкы Олимпиадасында коло байгеге күрөшүүгө мүмкүндүк берген көңүл жубатуучу беттеште жеңилүү ызасын тартып калды.

Мелдеште Атабек Азисбеков германиялык Денис Кудла менен каршылашып, 2:10 эсеби менен утулду.

Белгилей кетсек, Олимпиадага күрөштүн грек-рим түрү боюнча 87 килограмм салмакта катышып жаткан Атабек Азисбеков алгачкы жүрүшүн 1/8 финалда баштап, анда венгриялык күчтүү делинген Виктор Лоринц аттуу балбан менен кез келип, кыргыз балбаны мыкты күрөш көрсөткөнү менен атаандашы бир топ күчтүү болуп, Атабек Азисбеков венгриялык балбанга 6:1 эсебинде жеңилип калган.

3-августтагы спорттук оюндардын жүрүшүндө Кыргыз өлкөсү 2 медалга ээ болду. Күмүш медалды Акжол Махмудов, коло медалды Мээрим Жуманазарова тагынды.

Автор: Бактыгүл Момбекова