"Кар токтобой жаап жатат". Бишкек-Ош унаа жолунда бардык транспорт каттамдарына чектөө киргизилди

Республикада аба ырайы өзгөрүп, кардын тынбай жаашынан улам Бишкек-Ош унаа жолунда транспорт каражаттарынын каттамына чектөө киргизилди. Жол кыймылынын коопсуздугун камсыздоо башкы башкармалыгынын маалымат кызматынан белгилешкендей, чектөө бүгүн, 22-октябрь саат 08:30дан баштап киргизилди.

"Аба ырайынын кескин түрдө өзгөрүлгөнүнө ошондой эле Бишкек-Ош унаа жолунун Ала-Бел ашуусунда кардын тынымсыз жаап азыркы учурда унаалардын тыгыны пайда болгонуна байланыштуу Токтогул району аркылуу өткөн Бишкек-Ош унаа жолунун 272-чакырымында жайгашкан "Арал" стационардык постунан бардык унаалардын түрүнө убактылуу чектөө киргизилди.

Азыркы учурда тийиштүү кызматтар менен биргеликте жолду тынымсыз тазалоо иштери жүрүп жатат", - деп айтылат билдирүүдө.

Бишкек тарапка сапарга чыккан бардык айдоочуларга, керектүү шаймандарды алып, кышкы дөңгөлөктөргө алмаштыруу эскертилет.

Автор: Бактыгүл Момбекова
Фото: Республикалык жол кыймылынын коопсуздугун камсыздоо башкы башкармалык