Шашылыш билдирүү! Өлкө аймактарында абанын температурасы кескин төмөндөйт

Эртең, 5-ноябрда түнкүсүн аба ырайынын кескин өзгөрүлүшү күтүлөт. Бул тууралуу ӨКМдан билдиришти.

Билдирүүдө айтылгандай, көпчүлүк аймактарда мезгил-мезгили менен жаан-чачын жаашы, өрөөндөрдө жаан карга айланышы, тоо этектеринде жана тоолуу райондордо кар жаашы күтүлөт.

Кээ бир райондордо жаан-чачын катуу жаашы мүмкүн. Зымдарга жана бактарга суу кар жабышат.

Тоолуу райондордо жолдор тайгак жана тоңголок болуп, кар күрткүсү күтүлөт. Айрым жерлерде батыштан соккон шамалдын ылдамдыгы секундасына 15-20 метрге жетиши мүмкүн.

5-6-ноябрда абанын температурасы кескин төмөндөйт:

Чүй өрөөнүндө түнкүсүн -5…-10°, күндүз -2…-7°, Талас өрөөнүндө түнкүсүн -6…-11°, күндүз -3…-8°, Ош, Жалал-Абад, Баткен облустарынын өрөөндөрүндө түнкүсүн -1…-6° суук, күндүз 0…5° жылуу, Ысык-Көл ойдуңунда түнкүсүн -6…-11°, күндүз -1…-6°, Нарын облусунун дыйканчылык аймактарында түнкүсүн -10…-15°, күндүз -2…-7°, тоолуу райондордо түнкүсүн -21…-26°, күндүз -10…-15° суук болушу күтүлөт.

"Мындай туруксуз аба ырайы айыл чарба иштерин, унаа, энергетика жана коммуналдык кызматтардын ишин жана жайыттарда малды кармоону кыйындатат" деп айтылат маалыматта.

Автор: Жолдубек Качкынбаев