Ит багып, тулпар таптап... Үй жаныбарларына жакын дүйнөнүн өлкө башчылары

Бүгүн, 30-ноябрь - Бүткүл дүйнөлүк үй жаныбарларынын күнү. Бул майрамды белгилөө идеясы 1931-жылы Жаратылышты коргоо кыймылынын тарапташтырынын Италияда өткөн эл аралык конгрессинде көтөрүлүп чыккан. Анда бир катар экологиялык уюмдар жана жаратылышты коргоо коомдору адамдардагы жаныбарларга болгон жоопкерчилик сезимин тарбиялоого багытталган массалык иш-чараларды өткөрүүнү сунушташкан. Бул майрам ар өлкөдө ар кандай белгиленет. Кээ бир мамлекетте жаныбарларды ырайымсыз мамиледен коргоого багытталган акциялар өтсө, айрым жерлерде иттердин жана мышыктардын көргөзмөлөрү уюштурулат.

Бул жолу биз үй жаныбарларына жакын дүйнө президенттерин топтоп көрдүк. "Ат адамдын канаты, ит адамдын досу" демекчи, президенттердин басымдуу бөлүгү жогоруда аталган жаныбарларды жакшы көрүшөт экен.

Орус өлкө башчысы Владимир Путиндин бир эмес, бир нече иттери бар. Алардын көбүн белекке алган. Мисалы, бул Конни аттуу итти ага орус мамлекеттик ишкери Сергей Шойгу белек кылган.

Ал эми бул болгариялык овчарканы аталган өлкөнүн саясатчысы Бойко Борисов тартуулаган.

2013-жылы өзүнүн сүйүктүү үй жаныбарлары менен сейилдеп жүргөн учурунда тартылган сүрөт.

Алабай породасындагы бул күчүктү Түркмөнстандын президенти Гурбангулы Бердымухаммедов белекке берген.

Жогоруда айткандай итти жакшы көргөн мамлекет башчылар аз эмес. Төмөндө дүйнө лидерлеринин сүрөттөрү менен бөлүшөбүз.

Түштүк Кореянын президенти Мун Чжэ Ин да итти жакшы көрөрүн бул сүрөт далилдейт.

Ал эми Франциянын президенти Эммануэль Макрон өзүнүн ити менен кадимкидей сүйлөшөт. Бул сүрөт 2017-жылы Германиянын канцлери менен болгон жолугушуусунда тартылган.

Чехиянын өлкө башчысы Милош Земан жана анын ретривер породасындагы Дарси деген ити.

Англиянын ханайымы Елизавета II да итти жана атты жактырат. Чет элдик басылмалардын жазганына караганда, жаныбарларды багуу ага ырахат тартуулайт.

Тулпар таптагандардын катарына Чеченстандын президенти Рамзан Кадыров да кирет. Эске салсак, 2017-жылы кыргыз жигити ага өзгөчө аргымак тартуулаган.

Күлүк баккан дагы бир президент - Гурбангулы Бердымухаммедов. Түркмөнстандын эл башчысы тулпар минип жөн гана сейилдебестен, ат жарышка катышкан учурлары да болгон.

Гурбангулы Бердымухаммедовдун Ахалтекин породасындагы аргымагы арткы эки буту менен 10 метр аралыкты 4,19 секундда басып өтүп жаңы рекорд койгон. Бул жетишкендиги үчүн сертификатты "Гиннесстин рекорддор китебинин" өкүлү Шейда Субаши Гемиджи тапшырган.

Ошондой эле Гурбангулы Бердымхаммедов алабай тукумдагы итти жакшы көрөрүн баса белгилеп айта кетели. Ал тургай Түркмөнстанда Алабай майрамы негизделсе, Бердымухамедов 2019-жылы Алабайга арнап китеп жазган. Ошондой эле Ашхабадда жаңы салынган турак жай комплексинде түркмөн тукумундагы Алабай итине эстелик тургузулуп, анын ачылыш аземине президент Гурбангулы Бердымухамедов өзү катышкан. Түркмөн башчысы Орусиянын президенти Владимир Путинге жана премьер-министр Дмитрий Медведевге алабай тукумундагы итти белекке берген.

Мындан тышкары "Элдик ит багаар" жана "Эмгек сиңирген ит багаар" деген ардактуу наамдар негизделген. Наам менен кошо төш белги жана "Жылдын мыкты түркмөн Алабайы" деген медалдын эмблемасы да берилмей болгон.

АКШнын президенти Жо Байден да иттерди сүйгөн президенттердин бири. Байдендин эки немис овчаркасы бар болгон. Иттеринин аттары Чемп жана Майор. Жо Байден менен жубайы экөө 2018-жылы Делавэрдеги баш калкалоочу жайдан алышкан. Тилекке каршы, Чемп аттуу овчаркасы ушул жылдын июнь айында өлүп калган. Ит акыркы 13 жылдан бери Байдендин үй-бүлөсү менен жашап келген.