ЖЫЛНААМА: Бүгүн микро толкундуу меш сатыкка чыккан күнү. Эң биринчи чыгарылган буюмдун салмагы 1,5 тонна болгон

Алгачкы микро толкундуу мештерди аскер кызматындагылар тоңдурулган тамакты ээритүү үчүн колдонушчу.

Кымбат баадагы мештерди колунда бар адамдар гана сатып алышкан.

Микро толкундуу мешти ойлоп тапкан окумуштуу Песри Лебарон Спенсер.

Биздин замандагы микро толкундуу меш

Бүгүн сиз каалаган тамакты 1-2 мүнөттө ысытып берген, ашканадагы тың жардамчы сатыкка чыккан күн. Ал эмне десеңиз, ал - микро толкундуу меш.

Мындан туура 76 жыл мурда америкалык окумуштуу Перси Лебарон Спенсер ойлоп тапкан микро толкундуу мешке тамак-аш жаатында колдонуу үчүн патент берилген.

Айрымдар бул ашкана буюмун немис окумуштуулары экинчи дүйнөлүк согуш маалында ойлоп табышкан деген ойлорун дагы айтышат. Бирок бул вариант такталбаган бойдон калууда.

Жашоо-тиричилик шарттарын жеңилдеткен дагы бир техника кантип пайда болгон билгиңиз келеби? Анда анын тарыхына кайрылабыз.

Микро толкундуу мештин пайда болушу тууралуу бир нече божомолдор бар. Анын кантип пайда болгону тууралуу так маалымат азыркыга чейин жок.

Бири Спенсер магнетрондун жанынан өтүп бара жатканда чөнтөгүндөгү момпосуйлардын эрий баштаганын сезген дешет;
Башкалар окумуштуу магнетрондун үстүндө унутуп калган бутерброддун жылып калганын байкаган. Андан соң, албетте, анын кандайча ысыганын изилдеп баштаганын айтышат.

Кантсе дагы буга чейин эч бир окумуштуунун башына тамакты мындай жол менен жылытуу мүмкүн экендиги тууралуу идеялар келген эмес.

Алгачкы микро толкундуу меш "Radarange" деген аталышта 1947-жылы жарык көргөн. Анын көлөмү аябай чоң эле.

Бийиктиги 180 сантиметр
Салмагы 1,5 тонна
Баасы 1000-3000 доллар

Ал эми 1960-1962-жылдары бул ашкана буюмунун көлөмү кичирейип, баасы 500 доллардын тегерегинде чыгарыла баштаган. Ошондон тартып микро толкундуу мештин өнүгүү доору башталды десек болот. Өкүнүчтүүсү окумуштуу өзүнүн ойлоп тапкан мешинин эсебинен көп деле киреше таба алган эмес. Себеби ал жашоосундагы эң мыкты техниканы ойлоп тапкан учурда "Raytheon" аттуу компанияда иштечү.

Аталган компания окумуштууга аз гана акча төлөп берип, ойлоп табылган микро толкундуу мешти өзүнүн атына патенттеп алган.

6-декабрга карата жылнаама.

Автор: Нуркыз Курманбек кызы